भिगवण, (पुणे) : भिगवण पोलीस ठाण्याच्या हद्दीतील मदनवाडी चौफुला बस स्टॉपवर एसटी बसमध्ये चढणाऱ्या महिलेच्या पर्सची चेन उघडून तब्बल 1 लाख 40 हजार रुपये किमतीचे एक तोळ्याचे सोन्याचे मणी-मंगळसूत्र चोरणाऱ्या ‘लेडीज गँग’चा भिगवण पोलिसांनी पर्दाफाश केला. याप्रकरणी पोलिसांनी व स्थानिक नागरिकांनी दोन संशयित महिलांना घेराव घालून पकडले. पोलीस ठाण्यात झडती घेतली असता चोरीस गेलेला संपूर्ण मुद्देमाल जप्त करण्यात आला आहे.
सुमन आश्विन उपाधे (वय 26) व मोहीत राहुल कांबळे (वय 28, रा. दोघेही टेंभूर्णी, अकलूज चौकापुढे, ता. माढा, जि. सोलापूर) असे ताब्यात घेण्यात आलेल्या संशयित चोरट्यांची नावे आहेत. याबाबत उज्वला गणेश गायकवाड (वय-45, रा. पिंपळी, ता. बारामती, व्यवसाय – वॉर्डन) यांनी भिगवण पोलीस ठाण्यात फिर्याद दिली.
पोलिसांनी दिलेल्या माहितीनुसार, उज्वला गणेश गायकवाड या नातवंडांना भेटून खेड (ता. कर्जत, जि. अहिल्यानगर) येथून परत पिंपळीकडे जाण्यासाठी निघाल्या होत्या. प्रवासात दागिने चोरीला जाण्याच्या भीतीने त्यांनी आपल्या गळ्यातील सोन्याचे मणी-मंगळसूत्र काढून पर्समधील लहान पाकीटमध्ये कडक सुरक्षित ठेवले होते.
मंगळवारी सकाळी साडेअकरा वाजण्याच्या सुमारास त्या मदनवाडी चौफुला (ता. इंदापूर) येथे भिगवण-बारामती एसटी बसमध्ये चढत असताना, बसमधील गर्दीचा फायदा घेऊन महिलांनी त्यांच्या पर्सची चेन उघडून सोन्याच्या दागिन्यांचे पाकीट लांबवले. बसमध्ये चढल्यावर पर्सची चेन उघडी दिसल्याने आणि सोन्याचे पाकीट गायब असल्याचे लक्षात येताच उज्वला गायकवाड यांनी तात्काळ एसटी बसमधून खाली उतरून शोध सुरू केला.
चौकातील एका मावशीने दिलेल्या माहितीवरून दोन महिला समोरच्या स्वीटहोमच्या दिशेने गेल्याचे समजले. त्याच वेळी तेथे कर्तव्यावर असलेल्या महिला पोलीस अंमलदार वंदना भोंग यांच्या मदतीने त्यांनी स्वीटहोमच्या दिशेने धाव घेतली. तेथे संशयास्पदरित्या थांबलेल्या दोन महिलांकडे विचारपूस केली असता त्या उडवाउडवीची उत्तरे देऊ लागल्या.
दरम्यान, महिला पोलीस अंमलदार वंदना भोंग यांनी पोलीस स्टाफ व दोन पंचांच्या समक्ष आरोपी महिलांची कडक झडती घेतली असता, त्यांच्याकडे 1 लाख 40 हजार रुपये किमतीचे 1 तोळा वजनाचे सोन्याचे दोन डोर्ले व मणी असलेले मंगळसूत्र हस्तगत करण्यात आले. याप्रकरणी उज्वला गायकवाड यांच्या तक्रारीवरून भिगवण पोलीस ठाण्यात दोन्ही महिलांविरुद्ध गुन्हा दाखल करण्यात आला आहे.
