पुणे : मुंबई-बंगळूर वंदे भारत स्लीपर एक्सप्रेसची प्रतीक्षा करणाऱ्या प्रवाशांसाठी मोठी बातमी समोर आली आहे. या बहुचर्चित ट्रेनचे दोन रेक बंगळूरमध्ये दाखल झाले असून, येत्या एक ते दोन आठवड्यांत पुणे-सोलापूर मार्गावर या ट्रेनची ताशी 130 किलोमीटर वेगाने चाचणी घेतली जाणार आहे. ही ट्रेन सुरू झाल्यानंतर महाराष्ट्रातील वंदे भारत स्लीपर सेवेला सुरुवात होणार आहे.
मिरजमार्गे धावण्याच्या चर्चेला पूर्णविराम
गेल्या काही दिवसांपासून मुंबई-बंगळूर वंदे भारत स्लीपर ट्रेन मिरजमार्गे धावणार असल्याची चर्चा सुरू होती. मात्र, या मार्गावर ताशी 130 किलोमीटर वेगाने चाचणी घेणे शक्य नसल्याचे समोर आले आहे. त्यामुळे ट्रेन मुंबई-पुणे-सोलापूर-कलबुर्गी-बंगळूर या मार्गावरूनच धावणार असल्याचे रेल्वे अधिकाऱ्यांकडून स्पष्ट करण्यात आले आहे.
पुणे-बंगळूर प्रवासात पाच तासांची बचत
सध्या पुणे ते बंगळूरदरम्यान धावणाऱ्या उद्यान एक्सप्रेसला प्रवासासाठी सुमारे 18 तास 15 मिनिटे लागतात. मात्र, वंदे भारत स्लीपर एक्सप्रेसमुळे हा प्रवास सुमारे 13 तासांत पूर्ण होण्याची अपेक्षा आहे. त्यामुळे पुणे ते बंगळूर प्रवास करणाऱ्या प्रवाशांचा पाच तासांहून अधिक वेळ वाचणार आहे.
आठवड्यातून सहा दिवस धावणार
प्रस्तावित वेळापत्रकानुसार ही ट्रेन आठवड्यातील सहा दिवस धावणार असून, एक दिवस देखभालीसाठी राखीव ठेवण्यात येणार आहे. मुंबई आणि बंगळूर या दोन्ही ठिकाणांहून रात्री सुमारे 9 वाजता ट्रेन सुटण्याचे नियोजन आहे. मुंबई ते बंगळूर प्रवासासाठी सुमारे 16 तास, तर पुणे ते बंगळूर प्रवासासाठी सुमारे 13 तास लागणार आहेत.
या ट्रेनमुळे पुणे, सोलापूर आणि दक्षिण महाराष्ट्रातील प्रवाशांना बंगळूरकडे जाण्यासाठी जलद आणि आरामदायी पर्याय उपलब्ध होणार आहे. त्यामुळे वंदे भारत स्लीपरच्या चाचणी आणि प्रत्यक्ष सेवेकडे प्रवाशांचे लक्ष लागले आहे.
रेल्वे अभ्यासक पीयूष सांगापूरकर यांच्या मते, मुंबई-बंगळूर स्लीपर ट्रेन पुणे आणि सोलापूरमार्गे धावल्याने या भागातील प्रवाशांच्या वेळेत मोठी बचत होणार असून, इतर गाड्यांच्या तुलनेत ही सेवा अधिक वेगवान ठरण्याची शक्यता आहे.
