पुणे: दौंड शहर आणि तालुक्यातील नागरिकांसाठी आरोग्यसेवेच्या दृष्टीने महत्त्वाची बातमी समोर आली आहे. 50 खाटांवरून 100 खाटांपर्यंत श्रेणीवर्धन करण्यात आलेल्या दौंड उपजिल्हा रुग्णालयासाठी राज्य शासनाने 49 नवीन नियमित पदांच्या निर्मितीला मंजुरी दिली आहे. यामुळे रुग्णालय लवकरच पूर्ण क्षमतेने कार्यान्वित होण्याचा मार्ग मोकळा झाला आहे.
सार्वजनिक आरोग्य विभागाने यासंदर्भातील शासन निर्णय जारी केला असून, विस्तारित रुग्णालयाच्या इमारतीचे कामही अंतिम टप्प्यात आले आहे. यापूर्वी या इमारतीच्या बांधकामासाठी 33 कोटी 52 लाख रुपयांचा निधी मंजूर करण्यात आला होता.
नव्या मंजूर पदांमध्ये बधिरीकरण तज्ज्ञ, अस्थिव्यंग तज्ज्ञ, नेत्रशल्य चिकित्सक, दंतचिकित्सक, अपघात कक्ष वैद्यकीय अधिकारी, वैद्यकीय अधिकारी, स्टाफ नर्स, परिसेविका, प्रयोगशाळा तंत्रज्ञ, रक्तपेढी तंत्रज्ञ, एक्स-रे तंत्रज्ञ, ईसीजी तंत्रज्ञ, भौतिकोपचार तज्ज्ञ, आहारतज्ज्ञ, कक्षसेवक, शस्त्रक्रियागृह परिचर, सफाईगार तसेच प्रशासकीय आणि लिपिक वर्गातील विविध पदांचा समावेश आहे.
या पदभरतीमुळे रुग्णालयात तज्ज्ञ डॉक्टर, परिचारिका आणि तांत्रिक कर्मचाऱ्यांची उपलब्धता वाढणार असून रुग्णांना स्थानिक पातळीवर अधिक दर्जेदार आणि अत्याधुनिक आरोग्य सेवा मिळण्यास मदत होणार आहे.
यापूर्वी गंभीर आजार, अपघात किंवा शस्त्रक्रियांसाठी दौंड तालुक्यातील रुग्णांना पुणे किंवा इतर शहरांमध्ये जावे लागत होते. मात्र, रुग्णालयाची क्षमता वाढल्याने आणि आवश्यक मनुष्यबळ उपलब्ध झाल्याने नागरिकांना अनेक उपचार आता स्थानिक स्तरावरच मिळण्याची अपेक्षा व्यक्त केली जात आहे.
आमदार राहुल कुल यांच्या या यशस्वी पाठपुराव्याबद्दल दौंड तालुक्यातील नागरिकांमधून व रुग्णांमधून मोठे समाधान व्यक्त होत असून त्यांचे आभार मानले जात आहेत.
“दौंड तालुक्यातील शेवटच्या घटकापर्यंत उत्तम आरोग्य सुविधा पोहोचवणे हे आमचे ध्येय आहे. ३३ कोटी ५२ लाख रुपये खर्चून उभारली जाणारी सुसज्ज इमारती पूर्ण होत आली आहे, आणि आता ४९ नवीन पदे मंजूर झाल्यामुळे रुग्णांना तज्ज्ञ डॉक्टरांचे उपचार मिळतील. लवकरच या विस्तारित रुग्णालयाचे लोकार्पण करून ते जनतेच्या सेवेत समर्पित केले जाईल.”
— आमदार राहुल कुल (दौंड विधानसभा मतदारसंघ)
