न्हावरे: शिरूर तालुक्यातील शिंदोडी येथे महावितरणच्या ११ केव्ही विद्युत वाहिनीची तार अचानक तुटून ऊसाच्या शेतात पडल्याने विजेचा धक्का बसून एका तरुणाचा दुर्दैवी मृत्यू झाल्याची घटना शनिवारी (दि.१४)दुपारी घडली. या घटनेमुळे परिसरात हळहळ व्यक्त होत आहे. मृत तरुणाचे नाव अक्षय ऊर्फ बाळू धुळा हाके (वय २७, रा. शिंदोडी, ता. शिरूर, जि.पुणे) असे आहे.
मिळालेल्या माहितीनुसार,अक्षय हाके हा घराजवळील ऊसाच्या शेतात पाणी देण्याचे काम करीत होता. त्याच्या शेतालगत महावितरणची ११ केव्ही क्षमतेची विद्युत वाहिनी गेली आहे. दुपारच्या सुमारास अचानक या वाहिनीवरील एक विद्युत तार तुटून थेट ऊसाच्या शेतात पडली. त्यावेळी अक्षय शेतात पाणी देत असल्याने त्याला पडलेली विद्युत तार दिसून आली नाही.
दरम्यान,पाण्यातून प्रवाहित झालेल्या विजेचा तीव्र धक्का बसल्याने अक्षय गंभीर जखमी झाला. घटनेची माहिती मिळताच ग्रामस्थांनी घटनास्थळी धाव घेतली; मात्र,तोपर्यंत त्याचा मृत्यू झाला होता. या घटनेने हाके कुटुंबावर दुःखाचा डोंगर कोसळला असून, गावात शोककळा पसरली आहे.
महावितरणच्या विद्युत वाहिन्यांच्या देखभाल-दुरुस्तीबाबत प्रश्नचिन्ह उपस्थित होत असून, या घटनेची सखोल चौकशी करून संबंधित जबाबदारांवर तीव्र कारवाई करण्याची मागणी ग्रामस्थांकडून होत आहे.
