पुणे: अनोळखी मोबाईल क्रमांकावरून आलेली विवाह निमंत्रण पत्रिकेची लिंक उघडल्यामुळे पुण्यातील एका व्यावसायिकाला मोठा आर्थिक फटका बसला आहे. सायबर चोरट्यांनी लिंकच्या माध्यमातून त्यांच्या बँक खात्यातून 5 लाख 30 हजार रुपये ऑनलाइन पद्धतीने लंपास केल्याचा प्रकार उघडकीस आला आहे. या प्रकरणी बंडगार्डन पोलीस ठाण्यात गुन्हा दाखल करण्यात आला असून पोलिसांकडून तपास सुरू आहे.
पोलिसांनी दिलेल्या माहितीनुसार, तक्रारदार 56 वर्षीय व्यावसायिक असून ते बंडगार्डन रस्ता परिसरातील एका सोसायटीत राहतात. गेल्या महिन्यात त्यांच्या मोबाईलवर एका अनोळखी क्रमांकावरून विवाह सोहळ्याच्या निमंत्रणाची लिंक पाठविण्यात आली होती. ती लिंक त्यांनी उघडली. त्यानंतर दुसऱ्या दिवशी मध्यरात्री त्यांच्या मोबाईलवर ‘रघुनंदन कुमार ॲमेझॉन फ्रॉड’ असा संदेश प्राप्त झाला.
यानंतर सायबर चोरट्यांनी त्यांना एक ओटीपी पाठविला. काही वेळातच त्यांच्या बँक खात्यातून 5 लाख 30 हजार रुपयांचे ऑनलाइन व्यवहार झाल्याचे त्यांच्या लक्षात आले. तपासात ही रक्कम एका बँक खात्यात वर्ग करण्यात आल्याचे समोर आले आहे.
फसवणुकीची माहिती मिळाल्यानंतर संबंधित व्यावसायिकाने पोलिसांकडे तक्रार दाखल केली. त्यानुसार बंडगार्डन पोलिसांनी अज्ञात सायबर चोरट्यांविरुद्ध गुन्हा नोंदवला आहे. या प्रकरणाचा तपास पोलीस उपनिरीक्षक गणेश चव्हाण करत आहेत.
दरम्यान, अशा प्रकारच्या फसवणुकीच्या घटना वाढत असल्याने नागरिकांनी सतर्क राहण्याचे आवाहन पोलिसांनी केले आहे. अनोळखी क्रमांकावरून आलेल्या लिंक, संदेश किंवा एपीके फाईल्स उघडू नयेत, तसेच कोणत्याही परिस्थितीत ओटीपी किंवा बँकिंगसंबंधी माहिती इतरांना देऊ नये, असे आवाहन करण्यात आले आहे. संशयास्पद संदेश मिळाल्यास त्वरित संबंधित बँक आणि पोलिसांशी संपर्क साधण्याचा सल्लाही देण्यात आला आहे.
