पुणे: पुणे शहरातील वाढत्या वाहतूक कोंडीमुळे वाहनचालक त्रस्त असताना पुणे पोलिसांनी वाहतूक व्यवस्थेत महत्त्वाचा बदल करण्याचा निर्णय घेतला आहे. वाहतूक पोलिसांनी दंडात्मक कारवाईपेक्षा रस्त्यावरील वाहतूक सुरळीत करण्याला प्राधान्य द्यावे, असे आदेश पोलीस आयुक्त अमितेशकुमार यांनी दिले आहेत. त्यानुसार वाहतूक पोलिसांना 31 ऑगस्टपर्यंत ‘एनफोर्समेंट हॉलिडे’ देण्यात आला आहे.
या काळात सर्व कर्मचाऱ्यांकडील ई-चलन मशीन मुख्यालयात जमा करण्यात आली आहेत. त्यामुळे नियमित दंडवसुलीऐवजी पोलिसांना चौकांमध्ये प्रत्यक्ष उपस्थित राहून वाहतूक नियंत्रणाचे काम करावे लागणार आहे. ई-चलनद्वारे कारवाई करण्याचा अधिकार केवळ पोलीस उपनिरीक्षक आणि त्यापेक्षा वरिष्ठ अधिकाऱ्यांकडे राहणार आहे.
पावसामुळे पुण्यात अनेक ठिकाणी वाहतूक कोंडी निर्माण होत आहे. अशा परिस्थितीत पोलिसांनी वाहनांचा प्रवाह सुरळीत करण्यावर भर द्यावा, अशा सूचना देण्यात आल्या आहेत. सीसीटीव्हीच्या माध्यमातून वाहतूक कर्मचारी चौकात उपस्थित आहेत की नाही, तसेच कोंडी सोडवण्यासाठी प्रयत्न करत आहेत का, याची पाहणी केली जाणार आहे.
चौकातील कॉर्नर पार्किंग, रिक्षांचे अनधिकृत थांबे आणि सिग्नलजवळील डावीकडील मार्ग मोकळा ठेवण्यावर विशेष लक्ष दिले जाणार आहे. एखाद्या ठिकाणी मोठी कोंडी झाल्यास संबंधित पोलीस ठाण्यातील कर्मचाऱ्यांना तातडीने मदतीसाठी पाठवले जाणार आहे.
मात्र, मद्यपान करून वाहन चालवणाऱ्यांवरील कारवाई थांबणार नाही. सीसीटीव्ही आणि बॉडी कॅमेऱ्यांच्या मदतीने अशा वाहनचालकांवर कारवाई केली जाईल. गैरप्रकार रोखण्यासाठी डमी डिकॉय पथकाचीही मदत घेतली जाणार आहे.
शहरातील अपघातप्रवण ठिकाणे म्हणजेच ‘ब्लॅक स्पॉट’ शोधून तेथे प्रतिबंधात्मक उपाययोजना करण्याची जबाबदारी चौकी प्रमुखांवर देण्यात आली आहे. प्रतिबंधित वेळेत शहरात येणारी जड वाहने बाहेरच थांबवली जातील. याशिवाय रात्रीच्या वेळी वाहतूक सुरळीत ठेवण्यासाठी शहरातील 7 परिमंडळांमध्ये विशेष पथके तैनात केली जाणार आहेत. वाहतूक विभागातील 200 नवीन कर्मचाऱ्यांना वाहतूक नियमनाचे विशेष प्रशिक्षणही दिले जाणार आहे.
