विशाल शिंदे
वेल्हे, (पुणे) : तोरणा किल्ला पाहण्यासाठी गेलेल्या मुंबईतील पर्यटकाचा पाय घसरून सुमारे 250 फूट खोल दरीत पडण्याची घटना घडली. मात्र स्थानिक ग्रामस्थ आणि आपत्ती व्यवस्थापन पथकाच्या तत्परतेमुळे संबंधित पर्यटकाला सुखरूप बाहेर काढण्यात यश आले.
संजय वसंत नेवे (वय-64, रा. दहिसर, मुंबई) हे आपल्या मित्रांसह – मिलिंद सुरेश जोशी व सिद्धार्थ माधव लेले – तोरणा किल्ला परिसरात फिरण्यासाठी आले होते. वेल्हे मार्गे तोरणा पाहून दुपारी सुमारे 1 वाजता ते वाळंजाई भट्टी मार्गे परत येत असताना सायंकाळी अंदाजे 4 वाजण्याच्या सुमारास नेवे यांचा पाय घसरला आणि ते सुमारे 250 फूट खोल दरीत कोसळले.
घटनेची माहिती मिळताच हवेली आपत्ती व्यवस्थापन रेस्क्यू टीम आणि स्थानिक ग्रामस्थांनी तत्काळ घटनास्थळी धाव घेत शोधमोहीम सुरू केली. मोठ्या प्रयत्नांनंतर नेवे यांना दरीतून सुरक्षित बाहेर काढण्यात आले. या रेस्क्यू मोहिमेत तानाजी भोसले, वैभव भोसले, अनिल रेणुसे यांच्यासह स्थानिक अनिल देवगिरकर, संतोष देवगिरकर, दत्तात्रय देवगिरकर, शेखर कोकाटे, सुरेश शिंदे, धनशेवर शिंदे, सचिन साबळे, संजय जानकर आदींनी मोलाचे सहकार्य केले.
दरम्यान, वेल्हे पोलीस स्टेशनचे अमित देशमुख व बनकर साहेब यांनीही मदतकार्यामध्ये समन्वय साधला. या घटनेमुळे डोंगर-दऱ्यांमध्ये फिरताना अधिक काळजी घेण्याचे आवाहन प्रशासनाकडून करण्यात येत आहे.
