यवत, ता. ४ : वरवंड (ता. दौंड) येथील पाटील मळा परिसरात लिंबाच्या झाडाखाली खुलेआम सुरू असलेल्या ‘तीन पत्ती’ जुगार अड्ड्यावर यवत पोलिसांनी बुधवारी (ता.3) दुपारी दीड वाजण्याच्या सुमारास धाड टाकून ९ जणांना ताब्यात घेतले. तर एक जुगारी पोलिसांना चकवा देत ऊसाच्या शेतात पळून जाण्यात यशस्वी झाला. या कारवाईत रोख रक्कम, पत्ते आणि जुगाराचे साहित्य असा एकूण ५ हजार १३० रुपयांचा मुद्देमाल जप्त करण्यात आला आहे.
पांडुरंग सोपान दिवेकर (७२), संदीप भगवान रणधीर (५१), मल्हारी किसन दिवेकर (६०), गजानन वसंत माने (६०), इक्बाल रमजान शेख (६३), गुलाबराव बयाजी फरगडे (७९), सुरेश जनार्धन शिंदे (६२), श्रीकांत अशोक जगताप (३४) आणि अमोल सुभाष भोसले (३५) यांचा अशी अटक करण्यात आलेल्यांची नावे आहेत. तर भाऊसाहेब रामराव पवार हा आरोपी घटनास्थळावरून पसार झाला असल्याचे पोलिसांनी सांगितले.
पोलिसांनी दिलेल्या माहितीनुसार, पाटस पोलीस दुरक्षेत्रातील अधिकारी व कर्मचारी कर्तव्यावर असताना वरवंड गावातील पाटील मळा येथे काही जण पैशांचा हार-जीत लावून ‘तीन पत्ती’ जुगार खेळत असल्याची खात्रीशीर माहिती मिळाली. त्यानंतर पोलिसांनी पंचांसह घटनास्थळी धाव घेत छापा टाकला.
दुपारी साडेएकच्या सुमारास टाकलेल्या या धाडीत दोन वेगवेगळ्या ठिकाणी गोलाकार बसून जुगार खेळणारे इसम आढळून आले. पोलिसांनी कारवाई सुरू करताच एक जण ऊसाच्या शेतात पळून गेला. मात्र उर्वरित नऊ जणांना जागीच पकडण्यात आले. ताब्यात घेतलेल्या आरोपींमध्ये पांडुरंग दिवेकर, संदीप रणधीर, मल्हारी दिवेकर, गजानन माने, इक्बाल शेख, गुलाबराव फरगडे, सुरेश शिंदे, श्रीकांत जगताप आणि अमोल भोसले यांचा समावेश आहे. तर भाऊसाहेब पवार हा आरोपी घटनास्थळावरून पसार झाला आहे.
या छाप्यात आरोपींच्या समोर ठेवलेली रोख रक्कम, खेळात वापरलेले पत्ते आणि जुगाराचे इतर साहित्य जप्त करण्यात आले. विशेष म्हणजे, आरोपींमध्ये काही ज्येष्ठ नागरिकांचाही समावेश असल्याने परिसरात आश्चर्य व्यक्त करण्यात येत आहे. याप्रकरणी पोलीस कॉन्स्टेबल राजकुमार मोहन कोकरे यांनी सरकारतर्फे फिर्याद दिली आहे. त्यानुसार आरोपींच्या विरोधात महाराष्ट्र जुगार प्रतिबंधक कायद्यातील कलम १२ (अ) अंतर्गत यवत पोलीस ठाण्यात गुन्हा दाखल करण्यात आला आहे.
दरम्यान, वरवंड परिसरात सुरू असलेल्या या जुगार अड्ड्यामुळे कायदा-सुव्यवस्थेचा प्रश्न निर्माण होत असल्याची चर्चा नागरिकांमध्ये सुरू आहे. पोलिसांच्या या कारवाईमुळे बेकायदेशीर जुगार व्यवसाय करणाऱ्यांमध्ये खळबळ उडाली असून, फरार आरोपीचा शोध सुरू असल्याची माहिती पोलिसांनी दिली आहे.
