पुणे: सोशल मीडियावर आपल्या व्हिडिओंमधून विविध मुद्दे मांडणारे रीलस्टार संतोष पंडित सध्या चर्चेत आले आहेत. चंद्रकांत पाटील यांच्याबाबत सोशल मीडियावर आक्षेपार्ह व्हिडिओ प्रसारित केल्याप्रकरणी डेक्कन पोलिसांनी संतोष पंडित यांच्यासह दोघांविरोधात गुन्हा दाखल केला आहे. त्यानंतर त्यांच्यावर पोलिसांनी मध्यरात्री कारवाई केल्याची माहिती समोर आली आहे.
या प्रकरणाची सुरुवात सोशल मीडियावर प्रसारित झालेल्या एका व्हिडिओमुळे झाली. ‘राजकारण एक्सप्रेस’ या सोशल मीडिया अकाउंटवरून हा व्हिडिओ शेअर करण्यात आला होता. या व्हिडिओमध्ये उच्च व तंत्रशिक्षण मंत्री चंद्रकांत पाटील यांच्यावर टीका करण्यात आली होती. मात्र, या टीकेदरम्यान आक्षेपार्ह आणि शिवराळ भाषा वापरल्याचा आरोप तक्रारीत करण्यात आला आहे.
भाजपचे स्थानिक माजी नगरसेवक सुनील पांडे यांनी या व्हिडिओची दखल घेत डेक्कन पोलीस ठाण्यात तक्रार दाखल केली. त्यानंतर पोलिसांनी संतोष पंडित आणि त्यांच्या एका साथीदाराविरोधात भारतीय न्याय संहितेतील कलम 356, 296 आणि 3(5) अंतर्गत गुन्हा नोंदवला. या प्रकरणाचा पुढील तपास पोलिसांकडून सुरू आहे. दरम्यान, संतोष पंडित यांना मध्यरात्री सुमारे 1 वाजता त्यांच्या राहत्या घरातून पोलिसांनी ताब्यात घेतल्याची चर्चा आहे.
संतोष पंडित हे सोशल मीडियावर विविध नागरी आणि राजकीय विषयांवर व्हिडिओच्या माध्यमातून आपली भूमिका मांडण्यासाठी ओळखले जातात. त्यामुळे या प्रकरणानंतर पुण्यातील राजकीय आणि सोशल मीडिया वर्तुळात वातावरण चांगलेच तापले आहे. पुढील तपासानंतर या प्रकरणातील अधिक माहिती समोर येण्याची शक्यता आहे.
