लोणी काळभोर, ता. ६ : गेल्या दोन ते तीन दिवसांपासून पुणे, पिंपरी-चिंचवड आणि परिसरात सुरू असलेल्या मुसळधार पावसामुळे मुळा-मुठा नदीला मोठा पूर आला असून, विशेष म्हणजे खडकवासला धरणातून कोणताही पाण्याचा विसर्ग न करता देखील नदी दुथडी भरून वाहू लागली आहे. शहरातील पावसाचे पाणी मोठ्या प्रमाणात नदीपात्रात आल्याने ही परिस्थिती निर्माण झाली आहे. यामुळे नदीकाठच्या गावांमध्ये सतर्कतेचा इशारा देत हवेली तहसील प्रशासनाने खबरदारीच्या उपाययोजना सुरू केल्या आहेत.
हवेलीच्या अपर तहसीलदार तृप्ती कोलते-पाटील यांनी सांगितले की, पूरपरिस्थिती लक्षात घेऊन तहसील प्रशासन, पोलीस विभाग आणि सार्वजनिक बांधकाम विभागाच्या अधिकाऱ्यांनी संयुक्त पाहणी केली असून, नदीकाठच्या नागरिकांना सतर्क राहण्याच्या सूचना देण्यात आल्या आहेत. कोणतीही आपत्कालीन परिस्थिती उद्भवल्यास नागरिकांना तातडीने सुरक्षित स्थळी स्थलांतरित करण्याची तयारीही प्रशासनाने केली आहे.
मंडल अधिकारी, तलाठी तसेच संबंधित यंत्रणांना पूरस्थितीवर सतत लक्ष ठेवण्याचे निर्देश देण्यात आले आहेत. प्रशासनाने मुंढवा, केशवनगर, मांजरी खुर्द, मांजरी बुद्रुक, लोणी काळभोर, थेऊर, कोरेगाव मूळ, भवरापूर, अष्टापूर तसेच इतर नदीकाठच्या गावांची प्रत्यक्ष पाहणी करून परिस्थितीचा आढावा घेतला. या पाहणीत पोलीस आणि सार्वजनिक बांधकाम विभागाचे अधिकारीही सहभागी झाले होते.
दरम्यान, नदीच्या पाण्याची पातळी झपाट्याने वाढल्याने मांजरी येथील नदीवरील पूल वाहतुकीसाठी बंद करण्यात आला आहे. तसेच लोणी काळभोर-राजबाग येथील विश्वराज बंधाऱ्यावरून तब्बल दोन मीटरपेक्षा अधिक उंचीने पाणी वाहत असल्याने परिसरात सतर्कतेचे वातावरण आहे. नदीकाठच्या नागरिकांना अनावश्यकपणे नदीपात्राजवळ न जाण्याचे आवाहन प्रशासनाने केले आहे.
अनेक वर्षांपासून पुणे आणि पिंपरी-चिंचवड शहरातील मैलायुक्त पाण्यामुळे गटारगंगेचे स्वरूप आलेल्या मुळा-मुठा नदीने मुसळधार पावसामुळे पुन्हा एकदा दुथडी भरून वाहणारे रौद्र, पण नयनरम्य रूप धारण केले आहे. हे दृश्य पाहण्यासाठी लोणी काळभोरसह पंचक्रोशीतील नागरिकांनी नदीकाठ आणि विश्वराज बंधाऱ्यावर मोठी गर्दी केली होती. मात्र, वाढत्या पाण्याच्या प्रवाहामुळे नागरिकांनी सुरक्षित अंतर राखावे आणि प्रशासनाच्या सूचनांचे पालन करावे, असे आवाहन करण्यात आले आहे.
