इम्रान आत्तार
भोर: पंचायत समितीच्या सभापती मनीषा कंक यांच्या पुढाकाराने अखेर भोर महाड रस्त्यावरील खड्डे भरण्याला सुरुवात झाली असून रस्त्यावरील अपूर्ण मोऱ्यांचीही कामे होणार आहेत. यामुळे मागील एक वर्षापासून खड्ड्यामुळे त्रस्त झालेल्या नागरिकांनी सुटकेचा निस्वास सोडला आहे. यावेळी सभापती मनीषा कंक, पंचायत समिती सदस्य राजेश बोडके, शाखा अभियंता अमित सुर्वे, मंडल अधिकारी मुजीब शेख, सुनील भेलके, नितीन सोनावले, संतोष गोळे, गणेश
चऱ्हाटे, गुणाजी पारठे, विष्णू मादगुडे, नारायण पारठे, बाळासाहेब पारठे, मारुती कंक, देवा म्हसुरकर, सागर मळेकर ,धोंडीबा मालुसरे, कोंडीबा धामुनसे, लक्ष्मण धामूनसे, नीरा मळेकर, संजय मालुसरे आदीसह मोठ्या संख्येने नागरिक उपस्थित होते.
मागील एक वर्षापासून भोर महाड रस्त्यावरील वेनवडी ते निगुडघर दरम्यानच्या रस्त्यात मोठ मोठे खड्डे पडून त्यात पावसाचे पाणी साचून मोठ्या प्रमाणात चिखल झाला होता तर अनेक ठिकाणी मोऱ्यांची कामे अपूर्ण होती. यामुळे वाहतुकीला मोठ्या प्रमाणात अडथळा होत होता. यामुळे विद्यार्थी, जेष्ठ नागरिक, रुग्ण यांना वेळेवर जाता येत नव्हते.
अनेक अडचणींना सामोरे जावे लागत होते. दरम्यान याबाबत सभापती मनीषा कंक यांनी तहसीलदार व महामार्ग विभाग यांना मंगळवार (दि.१८) निवेदन देऊन खड्डे बुजवा आणि अपूर्ण कामे पूर्ण करा अन्यथा आंदोलनाचा इशारा दिला होता. आंदोलन होण्याअगोदरच आज बुधवार (दि.१९) लगेचच महामार्ग विभागाकडून खड्डे बुजवायला सुरुवात झाली आणि अपूर्ण मोऱ्यांची कामे सुरु करण्याचे आश्वासन महामार्ग विभागाने दिले आहे.
यामुळे गणेशोत्सव काळात कोकणात जाणाऱ्या नागरिकांना व हिरडसळ मावळ भागातील लोकांना खड्डे मुक्त रस्ता होणार असल्याने नागरिकांनी समाधान व्यक्त केले आहे. भोर महाड रस्त्याचे काम मागील एक वर्षापासून अपूर्ण होते. यामुळे रस्ता वर खड्डे की खड्ड्यात रस्ता अशा अवस्था झाली होती . काही ठिकाणी तर अक्षरशः रस्त्याची चाळण झाली होती. पावसाच्या रिपरिपितीत खड्डे चुकावावे की रस्ता चुकवावा हेच कळत नव्हते.अनेक लहान-मोठे अपघात होत होते. याबाबत नागरिकांकडून रस्ता दुरुस्त करण्याची वारंवार मागणी केली जात होती. यामुळे महामार्ग विभागाशी संपर्क करून सभापतींनी खड्डे भरायचा सूचना केल्या होत्या. त्यानुसार खड्डे भरायला सुरुवात झालेली आहे. पावसाळा संपताच लवकरच रस्त्याचे कामही सुरू होईल असे संबंधित विभागाकडून सांगण्यात आले.
