विशाल शिंदे
भोर : भोंगवली (ता. भोर) येथे घरासमोरील मोकळ्या जागेत पार्क केलेली हिरो कंपनीची एचएफ डिलक्स मोटारसायकल अज्ञात चोरट्याने चोरून नेल्याची घटना समोर आली आहे. ही घटना १२ ऑगस्टच्या रात्रीपासून १३ ऑगस्टच्या पहाटेच्या दरम्यान घडली.
याबाबत शुभम दत्तात्रय सुर्वे (वय २९, व्यवसाय नोकरी, रा. भोंगवली, ता. भोर, जि. पुणे) यांनी राजगड पोलीस ठाण्यात तक्रार दिली आहे.
पोलिसांच्या माहितीनुसार, सुर्वे यांनी त्यांची लाल-काळ्या रंगाची हिरो कंपनीची एचएफ डिलक्स मोटारसायकल घरासमोरील मोकळ्या जागेत पार्क केली होती. १२ ऑगस्ट रोजी रात्री सुमारे १०.३० वाजता पार्क केलेली ही मोटारसायकल १३ ऑगस्ट रोजी सकाळी ५.३० वाजण्याच्या सुमारास जागेवर आढळून आली नाही.
अज्ञात व्यक्तीने फिर्यादीच्या संमतीशिवाय मोटारसायकल चोरून नेल्याचे तक्रारीत नमूद करण्यात आले आहे. चोरीस गेलेल्या मोटारसायकलची अंदाजे किंमत २५ हजार रुपये असून तिचा क्रमांक एमएच १२ एसझेड ८२४४ असा आहे.
या प्रकरणी अज्ञात चोरट्याविरुद्ध भारतीय न्याय संहितेच्या कलम ३०३(२) अंतर्गत गुन्हा दाखल करण्यात आला आहे. चोरीस गेलेल्या मोटारसायकलीचा शोध घेण्यासाठी राजगड पोलिसांकडून तपास सुरू आहे.
या गुन्ह्याचा पुढील तपास पोलीस हवालदार निंबाळकर करीत असून, प्रभारी अधिकारी पोलीस निरीक्षक जाधव यांच्या मार्गदर्शनाखाली तपास सुरू आहे. परिसरातील सीसीटीव्ही फुटेज तसेच अन्य उपलब्ध माहितीच्या आधारे चोरट्याचा शोध घेण्याचे पोलिसांसमोर आव्हान आहे.
