दौंड: दौंड शहरातील रेल्वेच्या जुन्या वसाहतीत एका ७५ वर्षीय महिलेचा शिर नसलेला मृतदेह आढळल्याने मोठी खळबळ उडाली आहे. रक्ताच्या थारोळ्यात मृतदेह आढळल्याने परिसरात भीतीचे वातावरण निर्माण झाले असून, पोलिसांनी तपासाला सुरुवात केली आहे.
मिळालेल्या माहितीनुसार, नगर मोरी चौकाजवळ रेल्वेची ‘आरबी-वन’ वसाहत आहे. या वसाहतीतील एका खोलीतून दुर्गंधी येत असल्याचे स्थानिक रहिवाशांच्या लक्षात आले. त्यांनी तातडीने याची माहिती पोलिसांना दिली.
माहिती मिळताच पोलिसांनी घटनास्थळी धाव घेत संबंधित खोलीची पाहणी केली. यावेळी खोलीत एकटी राहणाऱ्या ७५ वर्षीय महिलेचा शिर नसलेला मृतदेह रक्ताच्या थारोळ्यात आढळून आला. मृतदेहाची अवस्था पाहता हा प्रकार अत्यंत गंभीर असल्याचे स्पष्ट झाले.
पोलिसांनी मृतदेह ताब्यात घेऊन शवविच्छेदनासाठी दौंड उपजिल्हा रुग्णालयात पाठवला आहे. महिलेचा मृत्यू नेमका कशामुळे झाला, तिची हत्या करण्यात आली आहे का आणि या घटनेमागे कोणाचा हात आहे, याचा तपास आता सुरू करण्यात आला आहे.
घटनेची माहिती मिळताच पोलिसांसह फोरेन्सिक पथकाने घटनास्थळी दाखल होत तपास सुरू केला. घटनास्थळावरील विविध पुरावे आणि परिस्थितीची बारकाईने पाहणी करण्यात येत आहे. महिलेच्या मृत्यूचे नेमके कारण शवविच्छेदन अहवालानंतर स्पष्ट होण्याची शक्यता आहे.
या धक्कादायक घटनेमुळे दौंड शहरातील रेल्वे वसाहतीत मोठी खळबळ उडाली असून, नागरिकांमध्ये भीतीचे वातावरण आहे. पोलिसांकडून या प्रकरणाचा सखोल तपास सुरू आहे.
