पुणे: पुण्यातील कोंढवा परिसरात आध्यात्मिक गुरू असल्याचा दावा करणाऱ्या तरुणाने फिजिकल अॅक्टिव्हिटीच्या नावाखाली एका तरुणीकडून अर्धनग्न फोटो मागवल्याचा धक्कादायक प्रकार समोर आला आहे. या प्रकरणी कोंढवा पोलिसांनी दिव्य जितेंद्र परमार (वय २३, रा. कोंढवा बुद्रुक) याला अटक केली आहे. न्यायालयाने त्याला पुढील तपासासाठी दोन दिवसांची पोलीस कोठडी सुनावली आहे.
या प्रकरणी एका तरुणीने कोंढवा पोलीस ठाण्यात तक्रार दाखल केली आहे. पोलिसांच्या माहितीनुसार, दिव्य परमार हा सोशल मीडिया इन्फ्लुएंसर असून, मानसिक शांतता आणि सकारात्मक विचारांसाठी त्याच्याकडे अनेक जण येत होते. संबंधित तरुणीदेखील त्याच्याकडे जात असल्याचे तक्रारीत नमूद करण्यात आले आहे.
याच दरम्यान परमारने फिजिकल अॅक्टिव्हिटीच्या नावाखाली तरुणीला तिच्या शरीरात निगेटिव्ह एनर्जी असल्याचे सांगितले. ही ऊर्जा दूर करण्यासाठी अर्धनग्न फोटो पाठवण्याची मागणी त्याने केल्याचा आरोप आहे. तसेच भीती दाखवून तरुणीकडून मोबाईलवरून असे फोटो मागवून घेतल्याचे पोलिसांनी सांगितले.
तरुणीने याबाबत पोलिसांकडे तक्रार केल्यानंतर कोंढवा पोलिसांनी विनयभंगासह जादूटोणा प्रतिबंधक कायद्यानुसार गुन्हा दाखल केला. त्यानंतर दिव्य परमारला अटक करण्यात आली.
पोलिसांनी आरोपीचा मोबाईल फोन आणि लॅपटॉपही जप्त केला असून, त्यातील माहितीची तपासणी सुरू आहे. या प्रकरणात आणखी काही व्यक्तींची फसवणूक किंवा अशाच प्रकारे गैरवर्तन झाले आहे का, याचा तपासही पोलीस करत आहेत. पुढील तपास कोंढवा पोलीस करीत आहेत.
