बारामती : बारामती तालुक्यातील वडगाव निंबाळकर पोलिसांनी जबरी चोरीच्या घटनांचा तपास करत मोठी कारवाई केली आहे. जबरी चोरीच्या गुन्ह्यांमध्ये सक्रिय असलेल्या चार आरोपींना पोलिसांनी अटक केली असून, त्यांच्याकडून दोन मोटारसायकली आणि चोरीतील सोन्याचे दागिने असा एकूण ११ लाख ८९ हजार रुपयांचा मुद्देमाल जप्त करण्यात आला आहे. या कारवाईमुळे पुणे ग्रामीण आणि सातारा जिल्ह्यातील जबरी चोरीचे तब्बल १० गुन्हे उघडकीस आले आहेत.
६ ऑगस्ट २०२६ रोजी पहाटे ४.४५ वाजण्याच्या सुमारास कानाडवाडी ते वाकी रस्त्यावरील शेतात काम करणाऱ्या स्वाती हणुमंत टकले या महिलेच्या गळ्याला दुखापत करून मोटारसायकलवरून आलेल्या चोरट्यांनी तिच्या गळ्यातील मनी आणि डोरले असा सुमारे ६ ग्रॅम वजनाचा सोन्याचा ऐवज जबरदस्तीने हिसकावून नेला होता. याप्रकरणी वडगाव निंबाळकर पोलीस ठाण्यात गुन्हा दाखल करण्यात आला होता.
या गुन्ह्याचा तपास करताना पोलिसांनी गोपनीय माहिती, तांत्रिक तपास आणि सीसीटीव्ही फुटेजच्या आधारे संशयितांची माहिती मिळवली. त्यानुसार राज मिथुन शिंदे, सनि रमण भोसले आणि पवन सॅन्डल काळे यांना ताब्यात घेऊन चौकशी करण्यात आली. चौकशीत संबंधित गुन्ह्यात त्यांचा सहभाग असल्याचे तपासात निष्पन्न झाल्याचे पोलिसांनी सांगितले.
अधिक तपासात या आरोपींनी यवत, जेजुरी, बारामती शहर, वालचंदनगर, लोणंद आणि फलटण परिसरातही जबरी चोरी केल्याचे समोर आले. चोरीतील सोन्याचे दागिने बापुराव भानुदास चोपडे याच्याकडे दिल्यानंतर त्याने ते प्रविण ज्ञानेश्वर वेदपाठक याला विकल्याचे तपासात निष्पन्न झाले. या दोघांनाही पोलिसांनी अटक केली आहे.
या कारवाईत वडगाव निंबाळकर, जेजुरी, वालचंदनगर, यवत, बारामती शहर, फलटण शहर आणि लोणंद पोलीस ठाण्यांच्या हद्दीतील एकूण १० जबरी चोरीचे गुन्हे उघडकीस आले आहेत.
या प्रकरणात राज मिथुन शिंदे, सनि रमण भोसले, बापुराव भानुदास चोपडे आणि प्रविण ज्ञानेश्वर वेदपाठक यांना अटक करण्यात आली आहे. तर पवन सॅन्डल काळे हा अद्याप फरार असून, पोलीस त्याचा शोध घेत आहेत.
या कारवाईत दोन मोटारसायकली आणि जबरी चोरीतील सोन्याचे दागिने असा एकूण ११ लाख ८९ हजार रुपयांचा मुद्देमाल जप्त करण्यात आला आहे.
ही कारवाई पुणे ग्रामीणचे पोलीस अधीक्षक संदीप सिंह गिल्ल, बारामती विभागाचे अपर पोलीस अधीक्षक गणेश बिरादार आणि बारामती उपविभागाचे उपविभागीय पोलीस अधिकारी चैतन्य कदम यांच्या मार्गदर्शनाखाली करण्यात आली. वडगाव निंबाळकर पोलीस ठाण्याचे प्रभारी अधिकारी सहाय्यक पोलीस निरीक्षक जीवन मोहिते यांच्या नेतृत्वाखाली पोलीस हवालदार पोपट नाळे, अनिल खेडकर, आबा जाधव, नरेंद्र यादव, धनंजय भोसले, हृदयनाथ देवकर, सूरज धोत्रे आणि भाउसाहेब मारकड यांच्या पथकाने ही कारवाई केली.
या प्रकरणाचा पुढील तपास सहाय्यक पोलीस निरीक्षक जीवन मोहिते करीत आहेत. फरार आरोपी पवन सॅन्डल काळे याचा शोध घेण्यासाठी पोलिसांकडून विविध पातळ्यांवर तपास सुरू आहे.
