पुणे : पुण्यातील वाघोली परिसरात विवाहितेने आत्महत्या केल्याची दुर्दैवी घटना समोर आली आहे. लग्नानंतर तब्बल 5 वर्षे माहेराहून पैसे आणण्यासाठी पती आणि सासरच्या मंडळींकडून होत असलेल्या कथित छळाला कंटाळून 33 वर्षीय महिलेने गळफास घेत आयुष्य संपवल्याचा आरोप आहे. या प्रकरणी लोणीकंद पोलिसांनी महिलेच्या पतीला अटक केली असून सासूविरोधातही गुन्हा दाखल करण्यात आला आहे.
अमृता राहुल वाघमारे (वय 33, रा. बकोरी रस्ता, वाघोली) असे मृत महिलेचे नाव आहे. सुमारे 5 वर्षांपूर्वी तिचा राहुल शिवाजी वाघमारे (वय 35) याच्याशी विवाह झाला होता. लग्नानंतर काही काळातच माहेराहून पैसे आणण्याची मागणी सुरू झाल्याचे तक्रारीत नमूद करण्यात आले आहे. या मागणीवरून अमृताला मानसिक तसेच शारीरिक त्रास दिला जात असल्याचा आरोप तिच्या कुटुंबीयांनी केला आहे.
सततच्या कौटुंबिक वादामुळे आणि कथित छळामुळे अमृता मानसिकदृष्ट्या त्रस्त होती, अशी माहिती समोर आली आहे. गुरुवारी दुपारी सुमारे 1 वाजण्याच्या सुमारास तिने राहत्या घरात गळफास घेतला. हा प्रकार लक्षात आल्यानंतर कुटुंबीयांनी तातडीने धाव घेतली. मात्र, तिचा मृत्यू झाला होता.
घटनेची माहिती मिळताच लोणीकंद पोलिसांनी तपास सुरू केला. अमृताच्या आईने पोलीस ठाण्यात तक्रार दाखल केली. तिच्या फिर्यादीवरून पोलिसांनी आत्महत्येस प्रवृत्त केल्याचा गुन्हा दाखल केला. त्यानंतर पती राहुल वाघमारे याला अटक करण्यात आली आहे.
या प्रकरणात अमृताच्या सासूविरोधातही गुन्हा नोंदवण्यात आला आहे. पोलीस उपनिरीक्षक रोहिणी गिरवलकर या प्रकरणाचा पुढील तपास करत आहेत. कौटुंबिक छळामागील नेमकी कारणे आणि इतर बाबींचा तपास पोलीस करत आहेत.
