पुणे: केतन अग्रवाल हत्या प्रकरणात तपास यंत्रणांनी आता अधिक कठोर पावले उचलण्यास सुरुवात केली आहे. लोणावळा ग्रामीण पोलिसांनी या घटनेचा उलगडा करण्यासाठी लोहगड किल्ल्यावर जाऊन सविस्तर ‘क्राईम सीन रिक्रिएशन’ केले आहे. या हत्येमागील कट किती नियोजित होता, हे तपासादरम्यान स्पष्ट झाले आहे.
केतनची होणारी पत्नी सिया गोयल आणि तिचा प्रियकर चेतन चौधरी यांनी मिळून हा भयानक प्लॅन आखला होता. तपासाचा महत्त्वाचा भाग म्हणून, पोलिसांनी केतनच्या वजनाएवढा एक डमी पुतळा तयार केला आणि ज्या ठिकाणाहून केतनला खाली ढकलले गेले, तिथेच हे प्रात्यक्षिक करून पाहिले असता पुतळाही छिन्नविछिन्न झाला होता. या प्रात्यक्षिकातून हेच समोर आले की, त्या दुर्गम ठिकाणाहून पडल्यानंतर कोणाचाही जिवंत वाचण्याची शक्यता शून्य आहे.
सिया गोयल आणि चेतन चौधरी या दोन्ही आरोपींना पोलिसांनी अटक केली असून, त्यांची पोलीस कोठडी 3 जुलैपर्यंत वाढवण्यात आली आहे. प्राथमिक तपासात असे समोर आले आहे की, सियाला हे लग्न मान्य नव्हते, म्हणून तिने आपल्या प्रियकराच्या मदतीने केतनचा कायमचा काटा काढण्याचे ठरवले. या हत्येमध्ये नेमकी कोणाची काय भूमिका होती आणि शेवटचा धक्का कोणी दिला, याचा पुरावा गोळा करण्यासाठी पोलीस प्रयत्न करत आहेत.
