हडपसर, ता. ३ : पिसोळी (ता. हवेली) परिसरातील एका फार्महाऊसमध्ये सुरू असलेल्या बेकायदा हुक्का पार्लरवर काळेपडळ पोलिसांनी बुधवारी (ता.1) मध्यरात्री धाड टाकत मोठी कारवाई केली. या कारवाईत तब्बल 75 लाख 80 हजार 739 रुपयांचा मुद्देमाल जप्त करण्यात आला असून, 12 जणांविरुद्ध गुन्हा दाखल करण्यात आला आहे. जप्त मुद्देमालामध्ये हुक्का साहित्य, तंबाखूजन्य फ्लेवर, महागडे मोबाईल, फॉर्च्युनर, मर्सिडीजसह तीन चारचाकी आणि दोन दुचाकी वाहनांचा समावेश आहे.
सुमित ओसवाल, प्रणव मुथा, जैद शेख, सोहेल सय्यद, फहीम सय्यद, आशरफ मोमीन, फरहान शेख, पवन मोडक, सागर मोडक, आथर्व कुदळे, साद सय्यद आणि अनिस सय्यद अशी गुन्हा दाखल करण्यात आलेल्यांची नावे आहेत.
पोलीस अंमलदार महादेव बालाजी शिंदे यांनी याप्रकरणी सरकारतर्फे काळेपडळ पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, काळेपडळ पोलिसांचे तपास पथक अवैध धंद्यांविरोधात गस्त घालत असताना गुप्त बातमीदारामार्फत पिसोळीतील फार्महाऊसमध्ये बेकायदा हुक्का पार्लर सुरू असल्याची माहिती मिळाली. या माहितीची खातरजमा करून सहाय्यक पोलीस निरीक्षक अमित शेटे यांच्या नेतृत्वाखाली पोलिसांनी पंचांसह रात्री सुमारे 10.15 वाजता फार्महाऊसवर छापा टाकला. त्यावेळी तेथे अनेक ग्राहक हुक्का ओढताना आढळले. पोलिसांना पाहताच काही जण पळून जाण्याचा प्रयत्न करत होते. मात्र पोलिसांनी तत्काळ सर्वांना ताब्यात घेतले.
तपासादरम्यान फार्महाऊसमध्ये ग्राहकांसाठी टेबल-खुर्च्यांची व्यवस्था करून पैसे घेऊन हुक्का पुरविला जात असल्याचे उघड झाले. चौकशीत फार्महाऊसचा व्यवस्थापक अनिस मनाफ सय्यद याने एका हुक्का पॉटसाठी 1 हजार २०० आकारले जात असल्याची कबुली दिली. पोलिसांनी आठ काचेचे हुक्का पॉट, तंबाखूयुक्त हुक्का फ्लेवरचे डबे, विविध कंपन्यांचे महागडे मोबाईल, फॉर्च्युनर, मर्सिडीज-बेंझ, महिंद्रा कंपनीची चारचाकी वाहने तसेच दोन दुचाकी असा एकूण 75.80 लाखांचा मुद्देमाल जप्त केला. जप्त करण्यात आलेले हुक्का फ्लेवर रासायनिक विश्लेषणासाठी (सीए) पाठविण्यात येणार असल्याचे पोलिसांनी सांगितले.
या प्रकरणी सुमित ओसवाल, प्रणव मुथा, जैद शेख, सोहेल सय्यद, फहीम सय्यद, आशरफ मोमीन, फरहान शेख, पवन मोडक, सागर मोडक, आथर्व कुदळे, साद सय्यद आणि अनिस सय्यद यांच्याविरुद्ध भारतीय न्याय संहिता (BNS) कलम 3(5) तसेच सिगारेट व अन्य तंबाखूजन्य उत्पादने (महाराष्ट्र सुधारणा) अधिनियम 2018 मधील कलम 4-अ व 21-अ अन्वये गुन्हा दाखल करण्यात आला आहे. ही कारवाई सहाय्यक पोलीस निरीक्षक अमित शेटे यांच्या मार्गदर्शनाखाली काळेपडळ पोलिसांच्या तपास पथकाने केली असून, पुढील तपास सुरू आहे.
