पुणे : पिंपरी-चिंचवड शहरातील निगडी परिसरात सोमवारी एका भीषण अपघातात संस्कृती भागवत बिरादार या 5 वर्षांच्या चिमुकलीचा प्राण गेला. महानगरपालिकेच्या कचरा संकलन करणाऱ्या वाहनाने चिरडल्याने या लहान मुलीचा जागीच मृत्यू झाला.
पोलिसांनी केलेल्या तपासात अत्यंत धक्कादायक बाब समोर आली आहे. कचरा गाडीचा मूळ चालक राजू कुमार गायकवाड (वय 38, रा. ओटास्कीम, निगडी) याने वाहनाची सूत्रे आपला मदतनिस राहुल लक्ष्मण चौहान (वय 28, रा. साने चौक, चिखली) याच्याकडे दिली होती. राहुलकडे ड्रायव्हिंग लायसन्स (चालक परवाना) नाही, याची पूर्ण कल्पना असूनही राजूने हे बेजबाबदार पाऊल उचलले.
परवाना नसलेला मदतनीस राहुल चौहान गाडी अत्यंत वेगाने आणि बेदरकारपणे चालवत होता. रस्त्यावरून जात असताना या वाहनाने एका उभ्या दुचाकीला जोरात धडक दिली. धडक बसल्यामुळे दुचाकीचा दणका रस्त्यावर असलेल्या संस्कृतीला लागला आणि ती खाली पडली. चालकाचे वाहनावरील नियंत्रण सुटल्याने कचऱ्याची गाडी थेट तिच्या अंगावरून गेली आणि यात या बालिकेचा चिरडून करुण अंत झाला.
या घटनेनंतर निगडी पोलिसांनी तत्परतेने कारवाई करत मूळ चालक राजू गायकवाड आणि मदतनीस राहुल चौहान या दोघांनाही तात्काळ ताब्यात घेतले. आरोपींना न्यायालयात हजर केले असता, या गंभीर आणि बेजबाबदार कृत्याची दखल घेत न्यायालयाने त्यांना 17 सप्टेंबरपर्यंत पोलीस कोठडी सुनावली आहे. या घटनेमुळे स्थानिक परिसरात तीव्र संताप व हळहळ व्यक्त केली जात आहे.
