उरुळी कांचन, (पुणे) : पुणे – सोलापूर महामार्गावर गारवा हॉटेलजवळ रस्ता ओलांडत असलेल्या तरुणाला भरधाव अज्ञात वाहनाने जोरदार धडक दिल्याची घटना घडली. या भीषण अपघातात गंभीर जखमी झालेल्या तरुणाचा उपचारादरम्यान ससून रुग्णालयात मृत्यू झाला. या घटनेत धडक देऊन जखमीला मदत न करता घटनास्थळावरून पसार झालेल्या अज्ञात वाहनचालकावर उरुळी कांचन पोलीस ठाण्यात गुन्हा दाखल करण्यात आला आहे.
रविंद्र अजिनाथ जगताप (वय 30, रा. कोरेगाव मूळ, कानकाटे वस्ती, ता. हवेली) असे मृत्यू झालेल्या तरुणाचे नाव आहे. याबाबत मयताचा भाऊ विशाल अजिनाथ जगताप, (वय 31, धंदा-ड्रायव्हर, रा, सदर) यांनी फिर्याद दिली आहे.
पोलिसांनी दिलेल्या माहितीनुसार, रविंद्र जगताप हे उरुळी कांचन येथील गुरु हॉटेलमध्ये मजुरीचे काम करीत होते. सोमवारी (ता. 14) सप्टेंबर रोजी रात्री सुमारे अकरा वाजण्याच्या सुमारास ते गारवा हॉटेलजवळ सोलापूर-पुणे महामार्गावरून पायी रस्ता ओलांडत होते. त्याचवेळी भरधाव वेगातील अज्ञात वाहनाने त्यांना जोरदार धडक दिली. या अपघातात रविंद्र यांच्या डोक्याला तसेच हात-पायांना गंभीर दुखापत झाली. अपघातानंतर वाहनचालकाने थांबून जखमीला मदत करण्याऐवजी घटनास्थळावरून वाहनासह पलायन केले.
अपघाताची माहिती मिळताच रविंद्र यांना प्रथम उरुळी कांचन येथील श्री सिद्धिविनायक रुग्णालयात दाखल करण्यात आले. प्रकृती गंभीर असल्याने त्यांना पुढील उपचारासाठी पुण्यातील ससून रुग्णालयात हलविण्यात आले. मात्र, उपचार सुरू असतानाच रविवारी (ता. 20) रात्री साडेदहा वाजण्याच्या सुमारास त्यांचा मृत्यू झाला.
दरम्यान, अपघातास कारणीभूत ठरलेल्या अज्ञात वाहनाचा आणि पसार झालेल्या चालकाचा शोध घेण्याचे आव्हान पोलिसांसमोर आहे. अपघात करून जखमीला रस्त्यावरच सोडून पसार झालेल्या वाहनचालकाचा तातडीने शोध घेऊन त्याच्यावर कठोर कारवाई करावी आणि मृत तरुणाच्या कुटुंबाला न्याय मिळवून द्यावा, अशी मागणी परिसरातील नागरिकांकडून होत आहे. या प्रकरणाचा पुढील तपास पोलीस हवालदार रवींद्र गोसावी करीत आहेत.
