डॉ. अशोक बालगुडे
हडपसर : कर्णकर्कश आवाज करणाऱ्या बेकायदेशीर मॉडिफाईड सायलेन्सरधारक बुलेटस्वारांविरोधात काळेपडळ पोलिसांनी केलेल्या कारवाईचे ससाणेनगर, काळेपडळ, मोहम्मदवाडी आणि हांडेवाडी परिसरातील नागरिकांनी स्वागत केले. ध्वनीप्रदूषण आणि वाहतूक नियमांचे उल्लंघन करणाऱ्यांवर सातत्याने कारवाई करण्याची मागणीही नागरिकांनी केली.
रात्रीच्या वेळी मोठ्या आवाजात दुचाकी चालविणाऱ्या वाहनचालकांमुळे लहान मुले, ज्येष्ठ नागरिक, विद्यार्थी आणि रुग्णांना त्रास होत असल्याच्या तक्रारी पोलिसांकडे करण्यात आल्या होत्या. त्याची दखल घेत पोलिसांनी मॉडिफाईड सायलेन्सर वापरणाऱ्या वाहनचालकांवर कारवाई केली. त्यामुळे परिसरातील नागरिकांना दिलासा मिळाल्याचे त्यांनी सांगितले. “पोलीस कारवाईमुळे नागरिकांमध्ये सुरक्षिततेची भावना निर्माण झाली असून, कायद्याचे उल्लंघन करणाऱ्यांना स्पष्ट संदेश मिळाला आहे. अशा कारवायांना नागरिकांचा पाठिंबा राहील,” असे सामाजिक कार्यकर्ते वैभव माने यांनी सांगितले.
दरम्यान, काळेपडळ पोलीस ठाण्याचे पोलीस निरीक्षक बाबर यांनी विविध सोसायट्यांतील नागरिकांच्या समस्या जाणून घेतल्या. त्या सोडविण्यासाठी आवश्यक कार्यवाही करण्याचे आश्वासन त्यांनी दिले. या वेळी FOSSH सोसायटी संघटनेसह ड्रीम्स आकृती, गंगा व्हिलेज, पेबल पार्क, यशरवी पार्क, समृद्धी, वर्धमान, ४८ ईस्ट, ड्रीम्स आशियाना, इशा इताशा एम्पायर, व्यंकटेश क्लासिक, रिदम काउंटी, यशराज, सत्यम निरंजनी, सिंपली सिटी, सेलेन पार्क, फिफ्थ अव्हेन्यू, एलिना आदी सोसायट्यांचे प्रतिनिधी व नागरिक उपस्थित होते.
