लोणी काळभोर, ता. 16 : पुणे-सोलापूर महामार्गावरील लोणी काळभोर (ता. हवेली) ग्रामपंचायत हद्दीतील एसटी बस स्थानकासमोर रिकामे ड्रम घेऊन सोलापूरच्या दिशेने जाणाऱ्या या टेम्पोवरील चालकाचे नियंत्रण सुटल्याने अपघात झाला. गुरुवारी (ता. 16) सकाळी पावणेसात वाजण्याच्या सुमारास हा अपघात झाला.
मिळालेल्या माहितीनुसार, टेम्पो चालक सोलापूर बाजूकडे जात असताना अचानक त्याचे वाहनावरील नियंत्रण सुटले आणि टेम्पो महामार्गाच्या मध्यभागी पलटी झाला. टेम्पोमध्ये रिकामे ड्रम असल्याने ते रस्त्यावर विखुरले गेले. या अपघातात टेम्पोचे मोठ्या प्रमाणावर नुकसान झाले आहे, मात्र चालक थोडक्यात बचावला असून कोणतीही जीवितहानी झालेली नाही.
अपघात वर्दळीच्या वेळी सकाळी सात वाजण्याच्या सुमारास झाल्याने महामार्गावर दोन्ही बाजूंनी मोठी वाहतूक कोंडी झाली होती. वाहने महामार्गाच्या मध्यभागी आडवे असल्याने सोलापूरकडे जाणारी वाहतूक पूर्णपणे ठप्प झाली होती.
अपघाताची माहिती मिळताच हडपसर वाहतूक शाखेचे ज्ञानोबा बडे, चेतन सुलाखे, सचिन कांबळे, पोलीस हवालदार साळुंखे आणि मदने यांनी तातडीने घटनास्थळी धाव घेतली. टेम्पो जड असल्याने तो बाजूला करणे कठीण जात होते, अखेर क्रेन पाचारण करण्यात आली. क्रेनच्या साहाय्याने अपघातग्रस्त टेम्पो बाजूला काढल्यानंतर आणि रस्त्यावर विखुरलेले ड्रम हटवल्यानंतर वाहतूक हळूहळू पूर्वपदावर आली.
दरम्यान, स्थानिक नागरिक आणि वाहतूक पोलिसांनी दाखवलेल्या तत्परतेमुळे काही वेळातच ही कोंडी फोडण्यात यश आले. मात्र, सकाळच्या सत्रात झालेल्या या अपघातामुळे प्रवाशांचे चांगलेच हाल झाले.
