बारामती: बारामतीत उपमुख्यमंत्री सुनेत्रा अजित पवार (Sunetra Pawar) यांच्या दौऱ्यादरम्यान आज सकाळी ‘सहयोग’ या निवासस्थानी आयोजित करण्यात आलेल्या जनता दरबाराला (Janata Darbar) नागरिकांचा मोठा प्रतिसाद मिळाला. सकाळी सुमारे 8.45 वाजल्यापासूनच बारामती तालुक्यातील विविध गावांमधून नागरिक येथे पोहोचले होते. आपापल्या समस्या थेट मांडण्यासाठी आलेल्या नागरिकांमध्ये महिलांची संख्या लक्षणीय होती. (Baramati News)
या जनता दरबारात नागरिकांनी स्थानिक पायाभूत सुविधा, शासकीय योजनांमधील अडचणी तसेच वैयक्तिक तक्रारी मांडल्या. विशेषतः ‘मुख्यमंत्री माझी लाडकी बहीण’ योजनेशी संबंधित काही अडथळे महिलांनी निदर्शनास आणून दिले. अर्ज प्रक्रिया, कागदपत्रे आणि लाभ मिळण्यात होणारा विलंब यासंदर्भात अनेकांनी तक्रारी केल्या. या सर्व तक्रारी संयमाने ऐकून घेत सुनेत्रा पवार यांनी उपस्थित प्रशासकीय अधिकाऱ्यांना संबंधित प्रश्न तातडीने मार्गी लावण्याच्या सूचना दिल्या. शासकीय योजना खऱ्या अर्थाने गरजूंपर्यंत पोहोचणे महत्त्वाचे असल्याचे त्यांनी यावेळी नमूद केले.
जनता दरबार ही नागरिकांना थेट प्रशासनाशी जोडणारी संकल्पना मानली जाते. स्थानिक स्तरावर निर्माण होणाऱ्या अडचणींचे त्वरित निराकरण व्हावे आणि लोकांना सरकारी कार्यालयांच्या फेऱ्या माराव्या लागू नयेत, या उद्देशाने अशा उपक्रमांचे आयोजन केले जाते. त्यामुळे नागरिकांना आपल्या समस्या थेट लोकप्रतिनिधींना सांगण्याची संधी मिळते.
दरम्यान, या कार्यक्रमादरम्यान बारामती वकील संघटनेच्या सदस्यांनीही भेट घेत विविध व्यावसायिक प्रश्नांवर चर्चा केली. तसेच पुण्यातील वाघोली येथे होणाऱ्या आगामी महाराष्ट्र केसरी कुस्ती स्पर्धेच्या आयोजकांनीही भेट देत स्पर्धेचे निमंत्रण दिले. यावेळी मानाच्या गदेची पूजा करण्यात आली. कुस्ती ही महाराष्ट्राच्या ग्रामीण संस्कृतीचा महत्त्वाचा भाग असून अशा स्पर्धांमधून ग्रामीण भागातील मल्लांना मोठे व्यासपीठ मिळते, असे मत व्यक्त करत स्पर्धेसाठी शुभेच्छा देण्यात आल्या.
