आदित्य बोराटे
बारामती: बारामती शहर तसेच बारामती तालुका पोलिस ठाण्याच्या हद्दीत मोटारसायकल चोरीच्या वाढत्या घटनांच्या पार्श्वभूमीवर स्थानिक गुन्हे शाखा व बारामती तालुका पोलिसांनी कारवाई करून एका युवकास अटक केली. त्याच्याकडून सुमारे ३० लाख रुपये किमतीच्या १३ बुलेट मोटारसायकली व ६ इतर मोटारसायकली, अशा एकूण १९ दुचाकी जप्त करण्यात आल्या. या कारवाईत १९ गुन्हे उघडकीस आल्याची माहिती पुणे ग्रामीण पोलिसांनी दिली.
समाधान बाळू काळे (वय २३, रा. मानेवाडी, ता. फलटण, जि. सातारा) असे अटक केलेल्या आरोपीचे नाव आहे. बारामती शहर परिसरात स्थानिक गुन्हे शाखा व बारामती तालुका पोलिसांची पथके गस्त घालत असताना चोरीची मोटारसायकल घेऊन मेडिकल कॉलेज परिसरात एक संशयित येणार असल्याची माहिती पोलिसांना मिळाली. त्यानुसार पोलिसांनी सापळा रचून संशयिताला ताब्यात घेतले.
पोलिसांनी केलेल्या चौकशीत त्याच्याकडे व्हीआयपी क्रमांकाची प्लेट असलेल्या बुलेटसह इतर मोटारसायकली आढळून आल्या. चोरी केलेल्या वाहनांवर महाराष्ट्र पोलिस, महाराष्ट्र वनसेवा व एसटी महामंडळाचे लोगो लावून त्यांचा वापर केल्याची माहिती पोलिसांनी दिली.
पोलिसांनी आरोपीकडून १३ बुलेट मोटारसायकली व ६ इतर मोटारसायकली जप्त केल्या. या वाहनांची किंमत सुमारे ३० लाख रुपये असल्याचे पोलिसांनी सांगितले. या कारवाईमुळे बारामती शहर व बारामती तालुका पोलिस ठाण्यात दाखल असलेले १९ गुन्हे उघडकीस आल्याचे प्रेसनोटमध्ये नमूद करण्यात आले आहे.
ही कारवाई पुणे ग्रामीणचे पोलिस अधीक्षक संदीपसिंह गिल्ल, अपर पोलिस अधीक्षक गणेश बिरादार, बारामती विभागाचे उपविभागीय पोलिस अधिकारी चैतन्य कदम यांच्या मार्गदर्शनाखाली स्थानिक गुन्हे शाखेचे पोलिस निरीक्षक प्रमोद क्षीरसागर, बारामती तालुका पोलिस ठाण्याचे पोलिस निरीक्षक नारायण पवार, पोलिस उपनिरीक्षक सुधीर वाळुंज, श्रेणी पो.स.ई. बाळासाहेब कारंडे, स्थानिक गुन्हे शाखेचे पोलीस अंमलदार शिवाजी निकम, किशोर तेलंग, स्वप्निल अहिवळे, शैलेश स्वामी, गुलाब पाटील, सुलतान डांगे, तुषार चव्हाण, रईस मुलानी, गणेश डेरे, बारामती तालुका पोलीस ठाणे पोलीस अंमलदार अभिजीत एकशिंगे, शशिकांत दळवी, भगवान थोरवे, मनोज पवार, सुरेंद्र वाघ, जितू शिंदे, भारत खारतोडे, जयश्री आटोळे, विठ्ठल तरंगे, यांनी केली आहे. आरोपी सध्या पोलीस कोठडी रिमांड मध्ये असून पुढील तपास बारामती तालुका पोलीस स्टेशन करत आहे.
