पुणे : पुण्यातील मुठा खिंडीत भरधाव वेगाने आलेल्या डंपरने चारचाकीला जोरदार धडक दिली. या अपघातात चारचाकीतील चालकाचा जागीच मृत्यू झाला आहे. तर त्यांची पत्नी आणि मुलगीही गंभीर जखमी झाल्या आहेत. पिरंगुट (ता.मुळशी) येथील विक्रांत अण्णा निकटे (वय २८) असे मृत्यू झालेल्या तरुणाचं नाव आहे. मयत विक्रांतची पत्नी वैष्णवी आणि दीड वर्षांची मुलगी या दोघीही गंभीर जखमी झाल्या आहेत. २४ डिसेंबरला सायंकाळी सुमारे पाच ते साडेपाच वाजण्याच्या सुमारास हा अपघात घडला.
पौड पोलिसांनी दिलेल्या माहितीनुसार, विक्रांत हा पत्नी आणि मुलीसह मुठा खोऱ्यातील वांजळे या त्याच्या सासरवाडीला गेला होता. सायंकाळी परत पिरंगुटला येताना मुठा खिंडीतील पारधीबुवा या ठिकाणच्या रस्त्यावर समोरून पुण्याच्या दिशेकडून मुठा गावाकडे भरधाव वेगाने डंपर आला होता. या डंपरने विक्रांतच्या चारचाकीला जोरदार धडक दिल्याने त्याचा जागीच मृत्यू झाला. त्याची पत्नी व दीड वर्षाची मुलगी या अपघातात जखमी झाल्या आहेत. पुढील तपास पौड पोलिस करत आहेत.
