लोणी काळभोर, (पुणे) : येथील रेनबो इंटरनॅशनल स्कूलमध्ये भारताचा 80 वा स्वातंत्र्य दिन मोठ्या उत्साहात आणि देशभक्तीमय वातावरणात साजरा करण्यात आला. कार्यक्रमाचे प्रमुख पाहुणे हरिपंत कुलकर्णी यांच्या शुभहस्ते राष्ट्रध्वजाचे ध्वजारोहण पार पडले. क्रीडा शिक्षक निखिल जाधव यांच्या मार्गदर्शनाखाली आणि विद्यार्थिनीअनुष्का नामुगडे हिच्या नेतृत्वाखाली शाळेच्या आर. एस. पी. ट्रूपच्या विद्यार्थ्यांनी अत्यंत शिस्तबद्ध व नेत्रदीपक परेड सादर करून राष्ट्रध्वजाला मानवंदना दिली. यावेळी विद्यार्थ्यांनी प्रात्यक्षिके सादर केली.
प्रमुख पाहुणे हरिपंत कुलकर्णी व शाळेचे अध्यक्ष नितीन काळभोर यांनी मनोगत व्यक्त केले. यावेळी कदमवाकवस्तीच्या माजी उपसरपंच राजश्री काळभोर, सचिव मंदाकिनी काळभोर, उपमुख्याध्यापक प्रशांत लाव्हरे, रेनबो किड्स स्कूलच्या प्राचार्या ऐश्वर्या काळभोर, प्रथमेश काळभोर, रामदास काळभोर यांच्यासह सर्व शिक्षक, कर्मचारी आणि पालक मोठ्या संख्येने उपस्थित होते.
संगीत शिक्षक कार्तिक गोरखे व शिवराज साने यांच्या मार्गदर्शनाखाली विद्यार्थ्यांनी स्वागतगीत आणि ‘हे राष्ट्र देवतांचे’ हे देशभक्तीपर गीत सादर केले. नृत्यशिक्षकअश्विन मनगुतकर यांच्या मार्गदर्शनाखाली विद्यार्थ्यांनी ‘वंदे मातरम्’ गाण्यावर अप्रतिम नृत्य सादर केले. तसेच कलाशिक्षक दीपक शितोळे यांनी स्वातंत्र्य दिनानिमित्त काढलेल्या आकर्षक फलकलेखनाने सर्वांचे लक्ष वेधून घेतले. प्राचार्या मिनल बंडगर यांनी शाळेच्या प्रगतीचा अहवाल सादर केला.
दरम्यान, कार्यक्रमाचे सूत्रसंचालन विद्यार्थिनी मन्नत शेख व शुभ्रा सासणे यांनी केले, तर शिवांगी चौधरी हिने उपस्थितांचे आभार मानले. शेवटी ‘वंदे मातरम्’च्या निनादाने कार्यक्रमाची सांगता झाली.
