अहिल्यानगर : अहिल्यानगर जिल्ह्यातील श्रीरामपूर शहरात वाढत्या गुन्हेगारीच्या पार्श्वभूमीवर पोलिसांनी मोठी कारवाई केली आहे. सरस्वती कॉलनी परिसरातील एका फ्लॅटवर टाकलेल्या धाडीत गावठी कट्टा, जिवंत काडतुसे तसेच काही महत्त्वाची कागदपत्रे जप्त करण्यात आली आहेत. या कारवाईनंतर शहरातील गुन्हेगारी कारवायांवर पोलिसांनी अधिक लक्ष केंद्रित केले आहे.
मिळालेल्या माहितीनुसार, एका फ्लॅटमध्ये एका तरुणीला बेकायदेशीरपणे डांबून ठेवण्यात आल्याची गुप्त माहिती पोलिसांना मिळाली होती. त्यानुसार पोलिसांनी रात्री उशिरा संबंधित फ्लॅटवर छापा टाकला. मात्र तेथे कोणतीही तरुणी आढळून आली नाही. तपासादरम्यान फ्लॅटमधून एक गावठी कट्टा, दोन जिवंत काडतुसे, बँकेचे पासबुक आणि काही वैद्यकीय कागदपत्रे जप्त करण्यात आली.
पोलिस तपासात संबंधित फ्लॅट शहरातील एका व्यक्तीच्या मालकीचा असल्याचे समोर आले. हा फ्लॅट करारावर शिवांजय उंडे याला देण्यात आला होता. त्याच्यामार्फत सोनू उर्फ जयप्रकाश बेग हा एका महिलेसोबत या फ्लॅटमध्ये राहत असल्याची माहितीही पोलिसांना मिळाली आहे.
सोनू बेग याला यापूर्वी दुसऱ्या एका गुन्ह्यात अटक करण्यात आली असून तो सध्या न्यायालयीन कोठडीत आहे. प्राथमिक तपासात तो या फ्लॅटमधून गुन्हेगारी टोळीचे कामकाज चालवत असल्याचा संशय व्यक्त करण्यात आला आहे. तसेच गुन्हेगारी कृत्यांसाठी आणि विक्रीच्या उद्देशाने शस्त्रे बाळगल्याचाही आरोप आहे.
या प्रकरणी पोलिसांनी शिवांजय बाळासाहेब उंडे, सोनू उर्फ जयप्रकाश बेग आणि श्रद्धा जयप्रकाश बेग यांच्याविरुद्ध विविध कलमान्वये गुन्हा दाखल केला असून पुढील तपास सुरू आहे. दरम्यान, शहरातील हॉटेल व्यावसायिकाच्या हत्येनंतर नागरिकांमध्ये संतापाचे वातावरण असून कायदा-सुव्यवस्था मजबूत करण्याची मागणी होत आहे.
