न्हावरे: न्हावरे–शिरूर ग्रामीण जिल्हा परिषद गटाची (Shirur News) निवडणूक भावनिक आणि विकासाच्या मुद्द्यांवर रंगणार असून,या गटामध्ये माजी आमदार स्व.बाबुरावजी पाचर्णे यांच्या (Nhavare News) पत्नी मालती पाचर्णे यांचे पारडे सध्या जड मानले जात आहे. त्यामुळे निवडणुकीच्या रणधुमाळीत सध्या तरी पाचर्णेंची बाजू वरचढ असल्याचे चित्र आहे. (Latest Marathi News)
दोन्ही राष्ट्रवादी काँग्रेस गट एकत्र आल्यानंतर या गटामध्ये राष्ट्रवादीकडून वृषाली वाळके यांना उमेदवारी देण्यात आली. मात्र, गेल्या जवळपास दोन महिन्यांपासून गटामध्ये दांडगा जनसंपर्क असलेल्या तृप्ती सरोदे यांची उमेदवारी ऐनवेळी रद्द करण्यात आल्याने सरोदे नाराज झाल्या. त्यानंतर त्यांनी शिवसेना शिंदे गटाकडून उमेदवारी दाखल केली आहे. त्यामुळे न्हावरे–शिरूर ग्रामीण गटात तिरंगी लढत होण्याचे संकेत स्पष्टपणे दिसून येत आहेत.
राष्ट्रवादी काँग्रेसच्या वृषाली वाळके या नवख्या उमेदवार असून, त्यांच्यासमोर भाजपच्या अनुभवी आणि परिचित चेहरा असलेल्या मालती पाचर्णे यांचे आव्हान पेलणे सध्या तरी अवघड मानले जात आहे. मात्र, निवडणुकीच्या अंतिम टप्प्यात उमेदवारांकडून होणाऱ्या जोरदार हालचाली, मतदारांशी थेट संपर्क आणि तथाकथित ‘लक्ष्मी दर्शन’ यामुळे वातावरण बदलून निकाल फिरण्याची शक्यता नाकारता येत नसल्याचे मत राजकीय जाणकार व्यक्त करत आहेत.
असे असले तरी पाचर्णे कुटुंबाविषयी मतदारांमध्ये असलेले प्रेम, तसेच माजी आमदार स्व. बाबुरावजी पाचर्णे यांच्या निधनानंतर निर्माण झालेली सहानुभूती, याचा थेट फायदा मालती पाचर्णे यांना होण्याची दाट शक्यता आहे. त्यामुळे विविध राजकीय समीकरणे,तिरंगी लढत आणि बदलत्या घडामोडी यामुळे न्हावरे–शिरूर ग्रामीण जिल्हा परिषद गटाची निवडणूक मालती पाचर्णे यांच्या बाजूने झुकलेली असल्याचे चित्र निर्माण झाले आहे.
त्याचप्रमाणे न्हावरे पंचायत समिती गणातून भाजपाचे सागर खंडागळे आणि राष्ट्रवादी काँग्रेसचे दीपक कोकडे यांच्यामध्ये अटीतटीची लढत होणार आहे.तर शिरूर ग्रामीण पंचायत समिती गणामध्ये भाजपच्या उज्वला भोस आणि राष्ट्रवादी काँग्रेसच्या स्वाती घावटे यांच्यामध्ये सरळ लढत होणार आहे.
