अक्षय टेमगिरे
शिक्रापूर :
गाडी घासल्याच्या किरकोळ कारणावरून झालेल्या वादाचे रूपांतर मारामारीत झाले पाच जणांनी शिवीगाळ व दमदाटी करत लाकडी काठ्यांनी तिघांना मारहाण केल्याची घटना शिक्रापूर हद्दीत पुणे–अहिल्यानगर महामार्गावर घडली असून या मारहाणीत एका तरुणाचा डावा हात फ्रॅक्चर झाला असून, याप्रकरणी शिक्रापूर पोलिसांनी पाच जणांना अटक केली आहे.
याबाबत नारायण आसाराम घोडके वय २६, व्यवसाय पॅकर्स अँड मुव्हर्स, रा. निगडी, रूपीनगर, पुणे मूळ रा. दुमेगाव, ता. गेवराई, जि. बीड यांनी शिक्रापूर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, २१ सप्टेंबर रोजी रात्री सुमारे नऊ वाजण्याच्या सुमारास पुणे–अहिल्यानगर महामार्गावर शिक्रापूर गावच्या हद्दीत चाकण चौकापासून पुण्याच्या दिशेने सुमारे २०० मीटर अंतरावर हा प्रकार घडला असून .
फिर्यादी यांचे वाहन क्रेटा कारला घासल्याने हा वाद झाला असून यावेळी योगेश बबन कर्डीले,कैलास आण्णा जगताप, अक्षय आप्पासाहेब अदमाने, रमेश सुभाष मिसाळ आणि ज्ञानेश्वर भगवान राऊत सर्व रा. वाघोली, ता. हवेली, जि. पुणे यांनी लाकडी काठ्यांनी नारायण घोडके, त्यांची आई छगाबाई आसाराम घोडके आणि भाचा विजय सुभाष काळे यांना मारहाण केल्याचे फिर्यादीत नमूद करण्यात आले आहे.
या मारहाणीत विजय काळे यांच्या डाव्या हाताला फ्रॅक्चर झाले असून इतर तिघांनाही हाताने व लाथाबुक्क्यांनी मारहाण करण्यात आल्याचे पोलिसांनी सांगितले असून. या प्रकरणी शिक्रापूर पोलीस ठाण्यात विविध कलमनान्वये गुन्हा दाखल करण्यात आला असून पाचही आरोपींना अटक करण्यात आली आहे. गुन्ह्यात वापरण्यात आलेल्या लाकडी काठ्या तसेच क्रेटा वाहन क्रमांक एमएच १२ एचओडी ०४३८ याबाबत तपास करण्यात येत आहे. या गुन्ह्याचा पुढील तपास शिक्रापूर पोलीस स्टेशनचे पोलीस निरीक्षक चंद्रशेखर यादव यांच्या मार्गदर्शनाखाली पोलीस हवालदार मुटेकर हे करीत आहेत.
दरम्यान, अपघात किंवा वाहन घासण्यासारख्या किरकोळ कारणावरून नागरिकांनी रस्त्यावर वाद घालून मारामारी करू नये अपघात कोणतीही व्यक्ती जाणीवपूर्वक करत नाही अशा प्रसंगी कायदा हातात न घेता तत्काळ पोलिसांची मदत घ्यावी, असे आवाहन शिक्रापूर पोलीस ठाण्याचे पोलीस निरीक्षक चंद्रशेखर यादव यांनी केले आहे.
