पुणे : मंगळवारी (दि. २२ सप्टेंबर) सायंकाळी साडेचारच्या सुमारास दमदार पावसाने पुणे-सोलापूर राष्ट्रीय महामार्गासह हडपसर परिसरातील रस्ते जलमय झाले. हडपसर-रवीदर्शन येथे पावसाळी चेंबर तुंबल्याने मोठ्या प्रमाणावर पाणी साचून वाहतूक ठप्प झाली. महापालिका प्रशासनाकडून कोणतीही तत्पर कार्यवाही होत नसताना वाहतूक पोलिसांनीच चेंबरचे झाकण काढून त्यातील कचरा व घाण साफ केली आणि पाण्याचा निचरा मोकळा करून वाहतूक सुरळीत केली.
हडपसर वाहतूक शाखेचे वरिष्ठ पोलीस निरीक्षक युवराज नांद्रे यांच्या मार्गदर्शनाखाली महिला पोलीस हवालदार रत्नमाला शंकर राणे आणि पोलीस शिपाई शिवाजी व्यंकटराव गोपनर यांनी मुसळधार पावसात रवीदर्शन येथील तुंबलेले चेंबर साफ करून पाण्याचा मार्ग मोकळा केला. त्यानंतर साचलेले पाणी ड्रेनेजमधून वाहून गेले आणि ठप्प झालेली वाहतूक पूर्ववत झाली.
याचवेळी पोलीस शिपाई गोपीनाथ करचे, पोलीस हवालदार अजय हगारे आणि बाबा आलकुंटे यांनीही परिस्थिती हाताळत वाहतूक सुरळीत करण्यासाठी प्रत्यक्ष रस्त्यावर उतरून काम केले. बाबा आलकुंटे यांनी शंकर मठ परिसरातील साचलेले पाणीही हटवून वाहतुकीचा मार्ग मोकळा केला.
विशेष म्हणजे, सायंकाळी सहा ते साडेसहाच्या दरम्यान पावसामुळे रस्त्यांवर पाणी साचून वाहनचालकांची कोंडी होत असतानाही महापालिका प्रशासनातील जबाबदार अधिकारी-कर्मचारी घटनास्थळी फिरकले नसल्याची तक्रार वाहनचालक आणि स्थानिक नागरिकांनी केली. नागरिकांच्या करातून वेतन घेणाऱ्या यंत्रणेने पावसाळी चेंबरची नियमित स्वच्छता आणि पाण्याचा निचरा याची जबाबदारी पार पाडणे अपेक्षित असताना, ऐन पावसात ही जबाबदारी वाहतूक पोलिसांवरच येणे ही पालिका प्रशासनाच्या कार्यपद्धतीवर गंभीर प्रश्नचिन्ह निर्माण करणारी बाब आहे.
पाऊस थांबण्याची वाट पाहणाऱ्या यंत्रणेला पोलिसांनी दिला धडा
पावसात वाहतूक कोंडी होऊन नागरिकांचे हाल सुरू असताना कार्यालयीन यंत्रणा कुठे होती, असा सवाल नागरिकांनी उपस्थित केला. दुसरीकडे, कोणतीही सबब न सांगता वाहतूक पोलिसांनी प्रत्यक्ष चेंबरमध्ये उतरून अडथळा दूर केला. त्यामुळे नागरिकांकडून रत्नमाला राणे, शिवाजी गोपनर, गोपीनाथ करचे, अजय हगारे आणि बाबा आलकुंटे यांच्या तत्परतेचे कौतुक होत आहे. प्रशासनाने अशा कर्तव्यदक्ष कर्मचाऱ्यांच्या कामाची दखल घेऊन त्यांचे अभिनंदन करावे, अशी मागणीही नागरिकांनी केली.
