सातारा: सातारा जिल्ह्यात अमली पदार्थांच्या (Satara Drug Case) वाढत्या जाळ्यावर पुन्हा एकदा मोठा घाव घालण्यात आल्याने जिल्हाभर खळबळ उडाली आहे. कराड तालुक्यातील Karad News) (पाचुकतेवाडी परिसरात पुण्याच्या डायरेक्टरेट ऑफ रेव्हेन्यू इंटेलिजन्स विभागाच्या पथकाने (Savarigaon News) अचानक छापा टाकून एक शेड सील केल्याची माहिती समोर आली आहे. अवघ्या महिनाभरापूर्वी जावळी तालुक्यातील सावरी गावात मुंबईच्या पथकाने शेकडो कोटींचे अमली पदार्थ जप्त केल्यानंतर ही दुसरी मोठी कारवाई असल्याने सातारा जिल्हा पुन्हा एकदा ड्रग्स नेटवर्कच्या चर्चेत आला आहे. (Latest Marathi News)
प्राथमिक माहितीनुसार, पाचुकतेवाडीतील संबंधित शेडमध्ये अमली पदार्थांची निर्मिती सुरू असल्याची ठोस माहिती DRI पथकाला मिळाली होती. त्यानुसार कोणतीही पूर्वसूचना न देता छापा टाकण्यात आला आणि संपूर्ण परिसर सील करण्यात आला. या ठिकाणी नेमक्या कोणत्या प्रकारचे अमली पदार्थ तयार केले जात होते, उत्पादन किती प्रमाणात होते आणि हे नेटवर्क कुठपर्यंत पसरले आहे, याबाबत सध्या अनेक तर्कवितर्क लावले जात आहेत.
या कारवाईतील महत्त्वाची बाब म्हणजे सातारा जिल्हा पोलीस आणि कराड पोलीस यांना या छाप्याबाबत कोणतीही पूर्वकल्पना देण्यात आलेली नव्हती. त्यामुळे ही कारवाई अत्यंत गोपनीय पद्धतीने करण्यात आल्याचे स्पष्ट होते. केंद्रीय तपास यंत्रणांनी थेट हस्तक्षेप केल्यामुळे स्थानिक पातळीवर सुरू असलेल्या ड्रग्स साखळीचा मोठा पर्दाफाश होण्याची शक्यता व्यक्त केली जात आहे.
मात्र, या छाप्यात नेमके काय जप्त करण्यात आले, किती जणांना ताब्यात घेण्यात आले किंवा अटक झाली आहे का, याबाबत अधिकृत माहिती अद्याप जाहीर करण्यात आलेली नाही. पुण्याच्या DRI विभागाकडून तपास पूर्ण झाल्यानंतरच तपशील समोर येण्याची शक्यता आहे.
सावरी आणि पाचुकतेवाडी या दोन कारवायांमुळे सातारा जिल्हा अमली पदार्थांच्या तस्करीसाठी केंद्रबिंदू बनत चालला आहे का, असा प्रश्न उपस्थित होत आहे. या घटनांमुळे नागरिकांमध्ये चिंता वाढली असून, जिल्ह्यातील तरुण पिढी आणि सामाजिक सुरक्षिततेबाबत गंभीर सवाल निर्माण झाले आहेत.
