बारामती : बारामती शहरातील भिगवण रोड परिसरातील एका निवासी इमारतीत ४ सप्टेंबरच्या पहाटे दुर्दैवी घटना घडली. इयत्ता अकरावी विज्ञान शाखेत शिकणाऱ्या १६ वर्षीय विद्यार्थिनीचा इमारतीच्या चौथ्या मजल्यावरून पडून उपचारादरम्यान मृत्यू झाला. या घटनेमुळे परिसरात हळहळ व्यक्त होत आहे.
मिळालेल्या माहितीनुसार, विद्यार्थिनी रात्री उशिरापर्यंत अभ्यास करत होती. तिची परीक्षा सुरू असल्याने ती अभ्यास करत असल्याचे कुटुंबीयांनी पोलिसांना सांगितले. मध्यरात्रीच्या सुमारास ती टेरेसवर गेली होती. बराच वेळ ती खाली न आल्याने तिचे वडील तिला पाहण्यासाठी टेरेसवर गेले. त्यानंतर काही क्षणांतच ती खाली पडल्याचे समोर आले.
कुटुंबीय आणि शेजाऱ्यांनी तिला तातडीने बारामती शासकीय वैद्यकीय महाविद्यालयात उपचारासाठी दाखल केले. मात्र उपचार सुरू असताना पहाटे तिचा मृत्यू झाला.
प्राथमिक माहितीनुसार, अभ्यास आणि परीक्षेच्या ताणामुळे विद्यार्थिनीने हे पाऊल उचलले असावे, अशी शक्यता कुटुंबीयांनी व्यक्त केली आहे. मात्र, पोलिसांनी या घटनेमागील नेमके कारण अद्याप स्पष्ट झाले नसल्याचे सांगितले असून, विविध शक्यतांचा तपास सुरू केला आहे.
सदर विद्यार्थिनी यापूर्वीही एकदा घरातून निघून गेली होती. त्या घटनेची नोंद बारामती पोलीस ठाण्यात झाली होती. या जुन्या घटनेशी सध्याच्या प्रकाराचा काही संबंध आहे का, याचीही पोलिसांकडून पडताळणी करण्यात येत आहे.
विद्यार्थिनी स्वतःचा मोबाईल वापरत नव्हती. ती पालकांचा मोबाईल वापरत असल्याची माहिती समोर आली आहे. त्यामुळे पोलिसांकडून मोबाईलमधील उपलब्ध डिजिटल माहितीची कायदेशीर पद्धतीने तपासणी केली जात आहे. तसेच तिच्या मैत्रिणी, शिक्षक आणि नातेवाईकांकडूनही माहिती घेतली जात आहे.
अभ्यासाच्या ताणाव्यतिरिक्त अन्य कोणते कारण होते का किंवा तिला कोणाकडून त्रास अथवा दबाव होता का, याचाही तपास केला जात आहे. सध्या बारामती शहर पोलीस ठाण्यात अकस्मात मृत्यूची नोंद करण्यात आली असून, पोलीस सर्व बाजूंनी तपास करत आहेत.
