आदित्य बोराटे
इंदापूर: अनैतिक संबंधांच्या संशयातून २९ वर्षीय तरुणाची लाकडी दांडक्याने व दगडाने मारहाण करून हत्या केल्याची धक्कादायक घटना इंदापूर तालुक्यातील निमगाव केतकी येथे घडली. गुरुवारी (दि. २९) ३.४५ वाजण्याच्या सुमारास केतकेश्वर विद्यालयाजवळ पालखी महामार्गावर ही घटना घडली. पुष्पराज मुरलीधर गायकवाड (वय २९, रा. सणसर, ता. इंदापूर) असे मृत तरुणाचे नाव आहे. या प्रकरणी इंदापूर पोलिसांनी दोघांविरुद्ध खुनाचा गुन्हा दाखल केला आहे.
याप्रकरणी मृत पुष्पराज यांची आई सुलोचना मुरलीधर गायकवाड (वय ४७, रा. सणसर) यांनी इंदापूर पोलीस ठाण्यात फिर्याद दिली आहे. त्यानुसार स्वप्नील भीमराव बारवकर आणि अशुतोष संजय भोंग (दोघेही रा. निमगाव केतकी, ता. इंदापूर) यांच्याविरुद्ध भारतीय न्याय संहिता २०२३ च्या कलम १०३(१), ३(५) नुसार गुन्हा दाखल करण्यात आला आहे.
पोलिसांनी दिलेल्या माहितीनुसार, मृत पुष्पराज याचे निमगाव केतकी येथील तलाठी भाऊसाहेब बारवकर यांच्या पत्नी तेजस्विनी बारवकर यांच्याशी अनैतिक संबंध असल्याच्या संशयातून आरोपींनी त्याला लाकडी दांडक्याने व दगडाने मारहाण केली. या मारहाणीत गंभीर जखमी झाल्याने पुष्पराज याचा मृत्यू झाल्याचे फिर्यादीत नमूद करण्यात आले आहे.
या घटनेमुळे सणसर आणि निमगाव केतकी परिसरात खळबळ उडाली आहे. या घटनेचे गांभीर्य लक्षात घेता इंदापूर पोलीस ठाण्याचे पोलीस निरीक्षक विलास नाळे पुढील तपास करीत आहेत. गुन्हा दाखल करण्याची कार्यवाही पी.एस.आय स्वाती सुरवसे यांनी केली.
