पुणे, ता. २६ : जागतिक अमली पदार्थ विरोधी दिनानिमित्त विश्रांतवाडी पोलीस ठाण्याच्या वतीने शुक्रवारी (ता. २६) भव्य जनजागृती बाईक रॅलीचे आयोजन करण्यात आले. “ड्रग्सला नकार, जीवनाला होकार” हा संदेश देत काढण्यात आलेल्या या रॅलीला नागरिकांचा उत्स्फूर्त प्रतिसाद मिळाला.
माननीय पोलीस उपायुक्त, परिमंडळ-४ यांच्या नेतृत्वाखाली सकाळी १०.३० ते दुपारी १२ या वेळेत ही रॅली पार पडली. विश्रांतवाडी पोलीस ठाण्यापासून रॅलीला प्रारंभ झाला. मुकुंदराव आंबेडकर चौक, छत्रपती संभाजी महाराज चौक (कळस), श्री छत्रपती शिवाजी महाराज चौक, आरएनडीई, विश्रांतवाडी चौक, धानोरी रोड, गोकुळनगर, भैरवनगर, भरत ढाबा, धानोरी जकात नाका, जाणता राजा चौक, गणपती चौक (मुंजाबा वस्ती), टिंगरेनगर, एअरपोर्ट रोड, सावंत पेट्रोल पंप चौक, कॉमरझोन, अग्रसेन शाळा, आरटीओ, सापरस चौक आणि आदर्श इंदिरानगर असा मार्ग पूर्ण करून रॅलीचा समारोप विश्रांतवाडी पोलीस ठाण्यात करण्यात आला.
रॅलीमध्ये ५२ दुचाकींसह महिला व पुरुष पोलीस अधिकारी-कर्मचारी, पोलीस मित्र, शांतता समितीचे सदस्य, महिला दक्षता समितीचे सदस्य तसेच मुक्तांगण व्यसनमुक्ती केंद्राचे प्रतिनिधी सहभागी झाले होते. सुमारे १०० ते १२० जणांनी या जनजागृती अभियानात सहभाग नोंदविला. अमली पदार्थांच्या वाढत्या विळख्यातून तरुणाईला दूर ठेवण्यासाठी आणि समाजात व्यसनमुक्तीबाबत जागरूकता निर्माण करण्याच्या उद्देशाने ही रॅली आयोजित करण्यात आली. रॅलीदरम्यान नागरिकांना अमली पदार्थांचे दुष्परिणाम समजावून सांगण्यात आले तसेच व्यसनमुक्त समाज घडविण्याचे आवाहन करण्यात आले.
दरम्यान, विश्रांतवाडी पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पार पडलेली ही जनजागृती बाईक रॅली शांततेत आणि उत्साहपूर्ण वातावरणात यशस्वीरित्या संपन्न झाली.
