पुणे : गेल्या काही दिवसांपासून भाजप आणि शिवसेना (शिंदे गट ) पक्षाकडून विरोधी पक्षातील आमदार -खासदार गळाला लावले जात आहेत.ठाकरे गटातील अनेक खासदार आणि आमदारांची साथ सुटत असल्याच्या चर्चा सुरू असतानाच, आता ठाकरे गटाचे ज्येष्ठ नेते आणि आमदार भास्कर जाधव यांच्याबाबत एका मोठ्या वक्तव्याने सर्वांचे लक्ष वेधले आहे. भाजप नेते आणि माजी आमदार प्रमोद जठार यांनी भास्कर जाधव यांना अप्रत्यक्षपणे सत्तेत येण्याची खुली ऑफर दिली आहे.त्यामुळे राजकीय वर्तुळात चर्चाना उधाण आलं आहे.
चिपळूण येथे आयोजित एका कार्यक्रमात ठाकरे गटाचे आमदार भास्कर जाधव आणि भाजपचे प्रमोद जठार एकत्र आले होते. या कार्यक्रमानंतर जठार यांनी भास्कर जाधव यांच्या राजकीय अनुभवाचे कौतुक केले.”भास्कर जाधव हे राज्यातील एक अत्यंत अनुभवी आणि ज्येष्ठ नेते आहेत. कोकणच्या विकासासाठी आणि राज्याच्या सत्तेत त्यांची खरोखरच गरज आहे. मात्र, ठाकरे गटाकडून त्यांच्या अनुभवाचा योग्य तो वापर केला जात नाहीये. त्यांना विरोधी पक्षनेतेपदही दिले गेले नाही असे त्यांनी म्हटले.
यावेळी बोलताना जठार यांनी एक सूचक विधानही केले. ते म्हणाले की, “आज आम्ही दोघांनी एकत्र येऊन एक झाड लावले आहे, आणि भविष्यात या झाडाला नक्कीच गोड फळे मिळतील.”विरोधी पक्षातील अनेक नेते सध्या सत्ताधारी गटात सामील होत असताना, भास्कर जाधव यांच्याबाबत भाजप नेत्याने केलेल्या या वक्तव्यामुळे राजकीय गोटात तर्क-वितर्कांना उधाण आले आहे.
यानंतर ठाकरेंचे भास्कर जाधव खरोखरच काही वेगळा निर्णय घेणार की ठाकरे गटातच ठाम राहणार, याकडे सर्वांचे लक्ष लागले आहे.
