अक्षय टेमगिरे
शिरूर: भीमा नदीपात्रात मोटार काढण्यासाठी गेलेल्या दहिवडी (ता. शिरूर) येथील साहेबराव बबन मुळीक वय ५१ हे पाण्याच्या प्रवाहात वाहून गेल्याची घटना ९ ऑगस्ट रोजी घडली होती.
गेल्या तीन दिवसांपासून सुरू असलेल्या शोधमोहीमेनंतर अखेर ११ ऑगस्ट रोजी त्यांचा मृतदेह आढळून आला असून पोलिसांनी दिलेल्या माहितीनुसार, ९ ऑगस्ट रोजी सकाळी साडेअकराच्या सुमारास साहेबराव मुळीक हे भीमा नदीपात्रात टाकलेली मोटार काढण्यासाठी गेले होते. मोटार काढण्याच्या प्रयत्नात असताना ते नदीच्या पाण्याच्या प्रवाहात वाहून गेले त्यानंतर कुटुंबीय नागरिक तसेच लोकनेते दौलत नाना शितोळे यांची आपत्ती व्यवस्थापन समिती संघ,पीएमआरडी पथकाच्या मदतीने त्यांचा शोध सुरू करण्यात आला.
दरम्यान ११ ऑगस्ट रोजी दुपारी एकच्या सुमारास रांजणगाव सांडस परिसरातील पोलीस पाटलांना नदीच्या पाण्यावर एक मृतदेह तरंगताना दिसला त्यांनी याबाबत माहिती दिल्यानंतर आपत्ती व्यवस्थापन संघाच्या मदतीने मृतदेह पाण्यातून बाहेर काढण्यात आला असून मृतदेह साहेबराव मुळीक यांचाच असल्याची त्यांचा मुलगा आदेश मुळीक यांनी खात्री केली आहे.
या प्रकरणी शिरूर पोलीस ठाण्यात अकस्मात मृत्यूची नोंद करण्यात आली आहे. या प्रकरणाचा तपास शिरूर पोलीस स्टेशनचे पोलीस निरीक्षक विनोद पाटील यांच्या मार्गदर्शनाखाली पोलीस उपनिरीक्षक पवार हे करीत आहेत .
