मुंबई: दिशा सालियन यांच्या मृत्यूशी संबंधित सोशल मीडिया पोस्टवरून सुरू झालेल्या वादात शिवसेना (UBT) नेते आदित्य ठाकरे यांनी सतीश सालियन यांच्या मानहानीच्या नोटीसला उत्तर दिले आहे. सतीश सालियन यांनी आदित्य ठाकरे यांना 500 कोटींची मानहानी नोटीस पाठवून माफी आणि नुकसानभरपाईची मागणी केली होती. मात्र, ठाकरेंनी नोटीसमधील आरोप नाकारत माफी मागण्यास किंवा नुकसानभरपाई देण्यास नकार दिला आहे.
आदित्य ठाकरे यांच्या वतीने वकील अंशुमन सिन्हा यांनी हे उत्तर पाठवले. त्यात ठाकरेंच्या सोशल मीडिया पोस्टमध्ये सतीश सालियन यांचे नाव किंवा त्यांची ओळख पटेल असा थेट उल्लेख करण्यात आलेला नव्हता, असा दावा करण्यात आला आहे. त्यामुळे त्यांच्या विरोधात बदनामीकारक विधान केल्याचा आरोपही त्यांनी फेटाळला आहे.
ठाकरेंच्या म्हणण्यानुसार, त्यांच्या सोशल मीडिया पोस्टचा संदर्भ सतीश सालियन यांच्याशी नव्हता. त्यांच्या वकिलांच्या उत्तरात काही राजकीय व्यक्ती, हितसंबंधी गट आणि माध्यमांतील काही घटकांकडून दिशा सालियन प्रकरणाशी त्यांचे नाव जोडले जात असल्याचा दावा करण्यात आला आहे. या संदर्भात ठाकरेंनी आपल्या पोस्टमध्ये सतीश सालियन यांच्याविषयी मानहानीकारक विधान केले नसल्याचे स्पष्ट केले आहे.
दरम्यान, सतीश सालियन यांनी 17 सप्टेंबर रोजी पाठवलेल्या नोटीसमध्ये आदित्य ठाकरे यांच्या सोशल मीडिया पोस्टमुळे आपली बदनामी झाल्याचा आरोप केला होता. त्यावर आता ठाकरेंनी सविस्तर कायदेशीर उत्तर दिले आहे. त्यामुळे या प्रकरणातील पुढील कायदेशीर घडामोडींकडे लक्ष लागले आहे.
