पुणे : पुण्यातील वाघोली परिसरात (Pune Wagholi News) एका अलिशान इमारतीत लिफ्ट कोसळून भीषण दुर्घटना घडली. शनिवारी (13 सप्टेंबर) संध्याकाळी साधारण 6 वाजण्याच्या सुमारास हा प्रकार घडल्याची माहिती आहे.
वाघोलीतील अर्बनो नावाच्या सोसायटीत ही घटना घडली. अपघातावेळी लिफ्टमध्ये तीन महिला, दोन पुरुष आणि एक लहान मुलगा असे एकूण 6 जण होते. चौथ्या मजल्यावरून खाली उतरण्यासाठी हे रहिवासी लिफ्टमध्ये चढले होते. लिफ्ट सुरु झाल्यानंतर ती दुसऱ्या मजल्यावर आली असता अचानक कोसळली. या प्रसंगामुळे लिफ्टमधील प्रवाशांमध्ये भीतीचे वातावरण निर्माण झाले.
सुदैवाने या घटनेत कोणतीही जीवितहानी झाली नाही. मात्र सर्वजण किरकोळ जखमी झाले असून, अपघाताची संपूर्ण घटना लिफ्टमधील सीसीटीव्ही कॅमेऱ्यात कैद झाली आहे. लिफ्ट कोसळल्यानंतरही सर्वजण सुखरूप बाहेर पडले. तरीही या अपघातामुळे सोसायटीतील रहिवाशांमध्ये लिफ्टच्या सुरक्षिततेबाबत गंभीर चिंता निर्माण झाली आहे.
या लिफ्टबाबत बिल्डरकडे वारंवार तक्रारी करण्यात आल्या होत्या, पण त्याने दुर्लक्ष केल्याचा आरोप रहिवाशांनी केला आहे. त्यामुळे रहिवाशांनी बिल्डरविरोधात पोलिसांकडे तक्रार दाखल करून कठोर कारवाईची मागणी केली आहे.
रहिवाशांनी दिलेल्या माहितीनुसार, इमारतीचा ताबा घेतल्यापासून लिफ्ट व्यवस्थित काम करत नव्हती. वारंवार बिघाड होत होता. कधी मध्येच लिफ्ट थांबत होती, तर कधी दिवे व बटणे कार्यरत राहत नव्हती. त्यामुळे विशेषतः जेष्ठ नागरिक, महिला आणि लहान मुलांना मोठ्या अडचणींचा सामना करावा लागत होता.
14 सप्टेंबर रोजी संध्याकाळी 7 वाजता चौथ्या मजल्यावरील रहिवासी खाली येत असताना लिफ्ट अचानक जोरात ग्राउंड फ्लोअरवर येऊन आदळली. रहिवाशांनी सांगितले की, “गेल्या दोन वर्षांपासून आम्ही बिल्डरकडे या लिफ्टची दुरुस्ती करण्याची मागणी करत आहोत. मात्र त्याने अजिबात लक्ष दिले नाही. त्यामुळे या बिल्डरवर कठोर कारवाई व्हावी म्हणून आम्ही वाघोली पोलीस ठाण्यात तक्रार दिली आहे.”
