लोणी काळभोर, ता. 22 : शिवसेना पुणे जिल्हा संघटक निलेश काळभोर यांना जिवे मारण्याचा कट रचून त्यांच्यावर हल्ला करण्याच्या उद्देशाने आलेल्या आरोपींचा आणि या संपूर्ण घटनेचा शिवसेनेच्या वतीने तीव्र शब्दांत निषेध करण्यात आला आहे. या प्रकरणातील मुख्य सूत्रधाराचा शोध घेऊन त्याला तातडीने जेरबंद करावे, या मागणीसाठी शिवसेनेच्या शिष्टमंडळाने लोणी काळभोर पोलीस ठाण्याला निवेदन दिले.
दिलेल्या निवेदनानुसार, निलेश काळभोर हे राजकीय आणि सामाजिक क्षेत्रात सक्रिय असल्याने त्यांच्यावर झालेल्या या हल्ल्याच्या प्रयत्नामुळे परिसरात खळबळ उडाली आहे. या प्रकरणातील मुख्य आरोपी अद्याप फरार असून, त्याच्याकडून काळभोर यांच्या जीवितास गंभीर धोका निर्माण झाला आहे. पोलिसांनी या प्रकरणाकडे गांभीर्याने लक्ष देऊन तपासाची चक्रे जलदगतीने फिरवावीत आणि मुख्य आरोपीसह या कटामागील मास्टरमाईंडला तात्काळ अटक करावी, अशी मागणी निवेदनात करण्यात आली आहे.
शिवसेनेच्या वतीने देण्यात आलेले हे निवेदन लोणी काळभोर पोलीस ठाण्याच्या गुन्हे शाखेच्या पोलीस निरीक्षक स्मिता पाटील यांनी स्वीकारले. यावेळी हे निवेदन देताना शिवसेनेचे उपजिल्हाप्रमुख अनिल काशीद, समन्वयक गणेश म्हस्के, तालुकाप्रमुख विपुल शितोळे, अनिल शिंदे, हेमंतकुमार कोळपे, अलंकार कांचन, योगेश झुरंगे, पारस वाल्हेकर, सागर कुंदेकर यांच्यासह मोठ्या संख्येने शिवसैनिक आणि पदाधिकारी उपस्थित होते.
