Pune News: न्हावरे: शिरूर (Shirur) तालुक्यातील दोन युवकांना दोन वर्षांसाठी तडीपार करण्यात आले असतानाही त्यांनी आदेशाचे उल्लंघन करून गावामध्ये प्रवेश केला. मिळालेल्या गुप्त माहितीच्या आधारे स्थानिक गुन्हे अन्वेषण विभागाच्या पथकाने तात्काळ कारवाई करत दोघांना ताब्यात घेतले. रोहित प्रमोद कर्डिले आणि दिपक दत्तात्रय जाधव अशी अटक (Arrest) करण्यात आलेल्या युवकांची नावे आहेत.
हेही वाचा- पुण्यात गणेशोत्सवात निमयांचे उल्लघंन, गणेश मंडळावर थेट न्यायालयाची कारवाई
निमोणे (ता.शिरूर) परिसरात तडीपार असूनही हे दोघे मुक्तपणे फिरत असल्याची माहिती स्थानिक गुन्हे अन्वेषण विभागाला मिळाली. त्यानंतर पोलीस हवालदार तुषार पंधारे, जनार्दन शेळके, संजू जाधव आणि सागर धुमाळ यांनी तत्परता दाखवत गावात जाऊन दोघांना ताब्यात घेतले. चौकशी दरम्यान दोघेही शासनाची कोणतीही परवानगी न घेता हद्दीत आल्याचे स्पष्ट झाले.
याबाबत स्थानिक गुन्हे अन्वेषण विभागाचे पोलीस हवालदार सागर शहाजी धुमाळ आणि संजू ज्ञानदेव जाधव(रा.शिरूर)यांनी शिरूर पोलीस स्टेशनमध्ये फिर्याद दाखल केली आहे. त्यानुसार रोहित प्रमोद कर्डिले (वय 24) आणि दिपक दत्तात्रय जाधव (वय 24), दोघे रा.निमोणे, ता.शिरूर, जि.पुणे) यांच्याविरुद्ध गुन्हा नोंदवण्यात आला असून त्यांना शिरूर पोलिसांच्या ताब्यात देण्यात आले आहे.
याप्रकरणी पुढील तपास शिरूरचे पोलीस निरीक्षक संदेश केंजळे यांच्या मार्गदर्शनाखाली पोलिस उपनिरीक्षक शुभम चव्हाण करीत आहेत.
