उमरटी: उमरटी हे (Pune News) मध्य प्रदेशातील बडवाणी जिल्ह्यात वसलेलं एक छोटं, डोंगराळ गाव आहे. पुणे शहरापासून सुमारे 500 (पाचशे) किलोमीटर अंतरावर, महाराष्ट्र आणि मध्य प्रदेशच्या सीमेवर हे गाव आहे. या गावात घरोघरी बेकायदा शस्त्रनिर्मितीचे कारखाने चालवले जातात. ‘मेक इन यूएसए’ असे शिक्के असलेली अनेक गावठी पिस्तुले आणि कट्टे उमरटीतच तयार होतात. ही शस्त्रे जळगाव आणि धुळे मार्गे महाराष्ट्रात आणली जातात.
गेल्या काही काळापासून गुन्हेगारांकडून जप्त केलेल्या शस्त्रांवर ‘USA’ असा विशिष्ट शिक्का दिसत होता. अधिक तपास केला असता हे शस्त्र उमरटी गावात सोप्या पद्धतीने भेटतात. पोलिसांनी शनिवारी उमरटी गावात छापा टाकला. छाप्यादरम्यान गावातील लोकांनी एकत्र येऊन पोलिसांना विरोध करण्याचा प्रयत्न केला, पण मध्य प्रदेश एटीएसच्या सहकार्यामुळे कोणतीही अनपेक्षित परिस्थिती उद्भवली नाही.
उमरटी गावात सुटे भाग बाहेरून आणले जातात आणि त्यापासून ऑर्डर मिळाल्यावर 5 ते 6 (पाच ते सहा) तासांत शस्त्रे तयार केली जातात. गुन्हेगार एकमेकांना या ‘उमरटी कनेक्शन’बद्दल माहिती देतात. त्यानंतर ऑर्डर देऊन पाहिजे तशी शस्त्रे बनवली जातात. दरम्यान, ती पुण्यात किंवा इतर ठिकाणी घेऊन जाण्यासाठी दुचाकीचा वापर केला जातो. यामुळे महाराष्ट्रातील गुन्हेगारांसाठी उमरटी हे शस्त्रांचा मुख्य स्रोत बनले आहेत. अनेक मोठ्या गुन्ह्यात वापरलेले शस्त्र उमरटीतून आणल्याचे समोर आले आहे.
