पुणे: पुणे आणि मुंबई (Pune News) या दोन शहरांदरम्यान रोज प्रवास करणाऱ्या हजारो प्रवाशांसाठी एसटी महामंडळाने (MSRTC) एक मोठी आनंदाची बातमी दिली आहे. पुणे स्टेशन ते बोरीवली (सायन मार्गे) या मार्गावर आता ‘ई-शिवाई’ ही वातानुकूलित इलेक्ट्रिक बस सेवा अधिकृतपणे सुरू झाली आहे. पर्यावरणपूरक आणि आरामदायी प्रवासाचा पर्याय दिल्याने खासगी ट्रॅव्हल्सच्या मक्तेदारीला आता महामंडळाने मोठे आव्हान दिले आहे.
वाढते प्रदूषण आणि इंधनाचे दर पाहता एसटी महामंडळाने आपल्या ताफ्यात ‘ई-शिवाई’ बसेसचा समावेश केला आहे. ही बस चिंचवड आणि सायन मार्गे बोरीवलीला पोहोचेल. सायन मार्गे जात असल्याने मध्य मुंबईत जाणाऱ्या प्रवाशांचीही मोठी सोय होणार आहे.
प्रवाशांची गर्दी लक्षात घेऊन महामंडळाने सकाळ आणि दुपारच्या सत्रात फेऱ्यांचे नियोजन केले आहे:
-
सकाळी: ६:००, ७:००, ८:०० आणि ९:०० वाजता.
-
दुपारी: १:००, २:००, ३:०० आणि सायंकाळी ४:०० वाजता.
पुणे-चिंचवड पट्ट्यातून बोरीवलीकडे जाणाऱ्या नोकरदार आणि व्यावसायिकांची संख्या मोठी आहे. खासगी बसचे अवाढव्य दर आणि अनिश्चित वेळापत्रक यामुळे प्रवाशांचे हाल व्हायचे. आता सरकारी दरात सुरक्षित, वातानुकूलित आणि वेळेत पोहोचवणारी सेवा उपलब्ध झाल्याने मध्यमवर्गीय प्रवाशांना मोठा दिलासा मिळाला आहे.
अधिक माहितीसाठी प्रवाशांनी msrtcors.com या संकेतस्थळाला भेट द्यावी किंवा MSRTC चे अधिकृत मोबाईल ॲप डाऊनलोड करावे.
