बीड: संपूर्ण (Viral News) देश ७७ व्या प्रजासत्ताक दिनाच्या उत्सवात मग्न असताना, महाराष्ट्रातील दोन जिल्ह्यांमध्ये मात्र प्रशासनाची मोठी दमछाक झाली. एका बाजूला कौटुंबिक वादातून तरुणाने जिल्हाधिकारी कार्यालयाची इमारत गाठली, तर दुसऱ्या बाजूला भ्रष्टाचाराच्या संतापातून एका तरुणाने ३०० फूट उंच टॉवरवर चढून ‘शोले’ स्टाईल आंदोलन केले.
बीडच्या जिल्हाधिकारी कार्यालयात नितीन उबाळे नावाच्या तरुणाने चक्क इमारतीच्या छतावर चढून आत्मदहनाचा इशारा दिला. त्याचे कारण ऐकून पोलीसही चक्रावून गेले, “माझी पत्नी नांदायला तयार नाही, पोलिसांनी मध्यस्थी करून माझा संसार सुरळीत करावा.” विशेष म्हणजे, नितीनने अशा प्रकारे आंदोलनाचा प्रयत्न करण्याची ही सहावी वेळ आहे.
मेहकर तालुक्यात मांडवा येथील वैभव करे या तरुणाने प्रशासनाला धारेवर धरले. ग्रामपंचायतीमधील भ्रष्टाचारावर कोणतीही कारवाई होत नसल्याच्या निषेधार्थ वैभव ३०० फूट उंच मोबाईल टॉवरवर चढला. “जोपर्यंत भ्रष्टाचाऱ्यांवर कारवाई होत नाही, तोपर्यंत खाली उतरणार नाही,” असा पवित्रा त्याने घेतला.
