पुणे: पुणे शहर वाहतूक विभागाने नवले पुलाजवळ सातत्याने होणाऱ्या अपघातांची गंभीर दखल घेतली असून प्रशासनाने एक महत्त्वपूर्ण निर्णय घेतला आहे. उद्या, 25 नोव्हेंबर (मंगळवार) पासून वाहनांसाठी नवीन वेगमर्यादा लागू करण्यात येणार आहे.
काही दिवसांपूर्वी नवले पुलावर झालेल्या भीषण अपघातात कंटेनरचे ब्रेक फेल झाल्याने 8 जणांना प्राण गमवावे लागले होते. दरम्यान, या संवेदनशील मार्गावर अपघातांचे प्रमाण कमी करण्यासाठी काही नियम जारी करण्यात आले आहेत. आता भुमकर ब्रीजपासून ते नवले पुलाच्या शेवटपर्यंत या संपूर्ण पट्ट्यात सर्व प्रकारच्या वाहनांसाठी कमाल वेगमर्यादा 30 किलोमीटर प्रतितास इतकी निश्चित करण्यात आली आहे.
वेगमर्यादेचा नियम फक्त नवले पुलाच्या तीव्र उतारावर लागू होता. मात्र, आता हा नियम संपूर्ण मार्गासाठी लागू करण्यात आला आहे. नियमांचे उल्लंघन करणाऱ्या वाहनांवर सीसीटीव्ही आणि स्पीड गनच्या मदतीने बारीक लक्ष ठेवले जाईल. नियम मोडणाऱ्या चालकांवर कडक दंडात्मक कारवाई करण्यात येणार आहे. गाडीचा वेग जास्त असेल तर 10 हजार रुपये ऑनलाइन फाइन यापुढे द्यावा लागणार आहे.
नव्या नियमावलीमुळे अपघातांची संख्या निश्चितच कमी होईल, अशी अपेक्षा प्रशासनाला आहे. मात्र, इतकी कमी वेगमर्यादा निश्चित केल्यामुळे या वर्दळीच्या मार्गावर वाहतूक कोंडी वाढण्याची शक्यताही अनेक तज्ज्ञांनी व्यक्त केली आहे.
