पुणे: महाराष्ट्राच्या ऊर्जा क्षेत्रात क्रांती घडवून आणणारा (Pune News) एक अत्यंत महत्त्वाचा पाऊल उचलण्यात आले आहे. पुणे आणि रायगड जिल्ह्यांच्या सीमेवर 2100 मेगावॉट क्षमतेचा ‘पिंपळपाडा-सावळे उदंचन जलविद्युत प्रकल्प’ उभारण्यासाठी राज्य सरकार आणि चॅम्बेरी पॉवर यांच्यात मुख्यमंत्री देवेंद्र फडणवीस यांच्या उपस्थितीत सामंजस्य करार करण्यात आला. हा केवळ एक प्रकल्प नसून, राज्याच्या औद्योगिक प्रगतीला वेग देणारा ‘पॉवर हाऊस’ ठरणार आहे.
उदंचन जलविद्युत तंत्रज्ञान हे बॅटरीसारखे काम करते. जेव्हा विजेची मागणी कमी असते, तेव्हा पाणी उंचावर साठवले जाते आणि मागणी वाढताच ते वेगाने खाली सोडून वीज निर्माण केली जाते.
चॅम्बेरी पॉवर (ईडीएफ सोल्युशन समूहाची कंपनी) या प्रकल्पात तब्बल 10 हजार 217 कोटी रुपयांची गुंतवणूक करणार आहे. या प्रकल्पामुळे पुणे आणि रायगड परिसरातील अंदाजे 2,500 तरुणांना रोजगाराच्या संधी उपलब्ध होतील.
सौर आणि पवन ऊर्जा दिवसा उपलब्ध असते, मात्र रात्री किंवा आपत्कालीन परिस्थितीत विजेचा तुटवडा भासतो. हा प्रकल्प ऊर्जा साठवणुकीचे काम करेल, ज्यामुळे महाराष्ट्राचा वीजपुरवठा अधिक स्थिर आणि सुरक्षित होईल. महाराष्ट्राने अशा एकूण 55 प्रकल्पांचे उद्दिष्ट ठेवले असून, त्यातून सुमारे 4.17 लाख कोटींची गुंतवणूक आणि लाखो लोकांसाठी रोजगार अपेक्षित आहे. या प्रकल्पातून राज्याला वार्षिक 1,762 कोटी रुपयांचा महसूल मिळेल.
