प्रतिनिधी अमित मुंडीक
Pune Crime : पुणे : विश्रामबाग पोलीस ठाण्यात नोंद झालेल्या घरफोडी प्रकरणाचा तपास करताना पोलिसांनी सहा घरफोड्यांचा उलगडा केला असून ‘सनी गँग’शी संबंधित दोन आरोपींना अटक केली आहे. या कारवाईत सुमारे 62 लाख रुपयांचा मुद्देमाल जप्त करण्यात आला आहे.
पोलीस उपायुक्त कृषिकेश रावले यांनी दिलेल्या माहितीनुसार, 18 जानेवारी रोजी विश्रामबाग पोलीस ठाण्यात घरफोडीचा गुन्हा दाखल करण्यात आला होता. या गुन्ह्याचा तपास करण्यासाठी विशेष पथक नेमण्यात आले. पथकाने अनेक सीसीटीव्ही चित्रफिती आणि गोपनीय माहितीच्या आधारे आरोपींची ओळख पटवली. फेब्रुवारी महिन्यात आरोपी पुण्याकडे येत असल्याची माहिती मिळाल्यानंतर सापळा रचून 23 फेब्रुवारी रोजी त्यांना ताब्यात घेण्यात आले.
अटक करण्यात आलेल्या आरोपींची नावे आकाश सुभाष (वय 23) आणि जितेंद्र चतुर्वेदी (वय 32) अशी असून ते दिल्ली येथील रहिवासी आहेत. तपासादरम्यान ते ज्या निवासगृहात थांबले होते, तेथून 32 तोळे सोने आणि 125 ग्रॅम चांदी जप्त करण्यात आली. तसेच त्यांनी चोरी केलेला काही मुद्देमाल दिल्लीतील सोनाराकडे ठेवला असल्याचे उघड झाले असून तोही जप्त करण्यात आला आहे.
या आरोपींवर दिल्ली आणि उत्तर प्रदेशमध्ये खून, खुनाचा प्रयत्न तसेच गुन्हेगारी टोळीविरोधी कायद्यांतर्गत अनेक गुन्हे नोंद असल्याची माहिती पोलिसांनी दिली. या प्रकरणात विश्रामबाग, समर्थ, खडक आणि भोसरी पोलीस ठाण्यांतील घरफोडीच्या गुन्ह्यांचा समावेश आहे. चोरीचा माल खरेदी करणाऱ्या सोनारांवरही पुढील कारवाई केली जाणार असल्याचे पोलिसांनी स्पष्ट केले.
