पुणे: लोणावळा ते कल्याण दरम्यान रेल्वे मार्गावर तांत्रिक कामे केली जाणार असल्याने (Pune News) पुणे आणि मुंबई दरम्यान धावणाऱ्या गाड्यांच्या वेळापत्रकात मोठे फेरबदल करण्यात आले आहेत.
प्रमुख एक्स्प्रेस गाड्यांना होणार विलंब:
तांत्रिक कामांमुळे पुणे आणि मुंबई दरम्यानच्या अनेक महत्त्वाच्या लांब पल्ल्याच्या गाड्यांच्या वेळेत बदल झाले आहेत; रेल्वे मार्गावरील कामासाठी 26 नोव्हेंबर ते 6 डिसेंबरपर्यंत हा विशेष ‘पॉवर ब्लॉक’ घेतला जाईल. या 11 दिवसांच्या कालावधीत पुणे आणि मुंबईला जोडणाऱ्या अनेक एक्स्प्रेस गाड्या त्यांच्या निर्धारित वेळेपेक्षा उशिराने धावतील. प्रवाशांनी प्रवास करण्यापूर्वी गाड्यांचे वेळापत्रक तपासावे, असे आवाहन रेल्वे प्रशासनाने केले आहे.
पुणे-CSMT डेक्कन एक्स्प्रेस सुमारे 1 तास 15 मिनिटे उशिराने पोहोचेल, तर कोल्हापूर-CSMT कोयना एक्स्प्रेसला 40 मिनिटांचा विलंब सहन करावा लागेल, तसेच बंगळुरू-CSMT उद्यान एक्स्प्रेस 30 मिनिटे उशिराने धावणार असून दौंड-इंदूर एक्स्प्रेस ही गाडी देखील 1 तास उशिरा सुरू होईल.
तसेच, 28 आणि 29 नोव्हेंबर रोजी पुणे-मुंबई इंटरसिटी आणि इंद्रायणी एक्स्प्रेसला सुमारे 10 ते 15 मिनिटांचा उशीर होण्याची शक्यता आहे. यासोबतच CSMT कडून धावणाऱ्या चेन्नई आणि हैदराबाद एक्स्प्रेसही लोणावळ्यात 10 ते 15 मिनिटे उशिरा पोहोचणार आहे.
लोकल सेवांवर थेट परिणाम:
या महत्त्वपूर्ण रेल्वे ब्लॉकमुळे पुणे-लोणावळा दरम्यानच्या लोकल प्रवासावरही मोठा परिणाम होणार आहे. सुमारे 11 दिवस चालणाऱ्या या कामामुळे उपनगरीय गाड्या त्यांच्या अंतिम स्थानकापर्यंत म्हणजेच लोणावळ्यापर्यंत पोहोचणार नाहीत. त्याऐवजी, सर्व लोकल गाड्या केवळ तळेगाव स्थानकापर्यंतच धावतील.
