पुणे: पुणे आणि युएई (UAE) दरम्यान थेट हवाई कनेक्टिव्हिटीची प्रवाशांची जुनी मागणी आता पूर्ण होणार आहे. पुणे आंतरराष्ट्रीय विमानतळापासून (Pune International Airport) अबू धाबीपर्यंत थेट विमानसेवा सुरू करण्याची घोषणा एअर इंडिया एक्सप्रेस कंपनीने केली आहे. यामुळे पुणेकरांना 2 डिसेंबरपासून या जलद प्रवासाचा पर्याय उपलब्ध असणार आहे.
आठवड्यातून 3 दिवस सेवा:
या नवीन आंतरराष्ट्रीय उड्डाणांचे वेळापत्रक व्यावसायिक आणि खासगी प्रवाशांसाठी अत्यंत सोयीचे आहे. ही सेवा आठवड्यातून तीन वेळा उपलब्ध असेल.
- प्रवासाचे दिवस: मंगळवार, गुरुवार आणि शनिवार.
- पुण्याहून विमानाचे टेक-ऑफ: रात्री 8.50 वाजता.
- अबू धाबीत लँडिंग: त्याच रात्री 10.45 वाजता.
- परतीचे उड्डाण: रात्री 11.45 वाजता अबू धाबीहून निघून, दुसऱ्या दिवशी पहाटे 4.15 वाजता विमान पुण्यात उतरेल.
युएईसाठी थेट मार्ग:
सध्या पुणे विमानतळावरून अनेक आशियाई शहरांसाठी थेट विमान सेवा आहे. मात्र, युएईसाठी, नॉन-स्टॉप सेवा नसल्याने नागरिकांनी ही सेवा सुरु करण्याची मागणी केली होती. ही नवीन सेवा सुरू झाल्यामुळे प्रवाशांना आता मध्ये न थांबता (non-stop) थेट अबू धाबीला पोहोचता येईल. एअर इंडिया एक्सप्रेसने यापूर्वी सुरू केलेल्या सिंगापूर आणि बँकॉकला थेट जाणाऱ्या विमानसेवेच्या यशानंतर आता अबू धाबीसाठी थेट विमान सेवा सुरु करण्यात आली आहे. ज्यामुळे अनेक प्रवासी या निर्णयामुळे सुखावले आहे.
