पुणे : महाराष्ट्र नवनिर्माण विद्यार्थी सेनेचे अध्यक्ष अमित ठाकरे पुणे दौऱ्यावर असताना शासकीय तंत्रनिकेतन महाविद्यालयाला भेट दिली. यावेळी वसतिगृह अधीक्षकांच्या कार्यालयात छत्रपती शिवाजी महाराजांच्या फोटोच्या शेजारी पंतप्रधान नरेंद्र मोदी यांचा फोटो लावलेला दिसला. हा प्रकार पाहून अमित ठाकरे यांनी आक्षेप घेत कार्यकर्त्याला फोटो काढण्याचे निर्देश दिले.
अमित ठाकरे यांच्या आदेशानंतर मनसेच्या कार्यकर्त्याने काही वेळातच भिंतीवर लावलेला मोदींचा फोटो खाली उतरवला. या घटनेमुळे महाविद्यालयातील वातावरणात काही काळ राजकीय चर्चा रंगली.
पुण्यातील शासकीय तंत्रनिकेतन महाविद्यालयात मनसेच्या विद्यार्थी शाखेचे उद्घाटन करण्यात आले. या कार्यक्रमासाठी अमित ठाकरे महाविद्यालयात आले होते. कार्यक्रमानंतर त्यांनी परिसराची पाहणी केली. यावेळी त्यांनी कँटीनसह महाविद्यालयातील विविध सुविधांची माहिती घेतली.
पाहणीदरम्यान वसतिगृह अधीक्षकांच्या कार्यालयात लावलेल्या फोटोंकडे त्यांचे लक्ष गेले. छत्रपती शिवाजी महाराजांच्या फोटोच्या बाजूला पंतप्रधान नरेंद्र मोदी यांचा फोटो असल्याचे दिसल्यानंतर त्यांनी याबाबत प्रश्न उपस्थित केला.
शासकीय कार्यालयांमध्ये कोणत्या व्यक्तींचे फोटो लावावेत, यासंदर्भात सरकारकडून काही नियम आणि मार्गदर्शक सूचना आहेत. त्यामुळे शासकीय महाविद्यालयातील कार्यालयात हा फोटो का लावण्यात आला, असा सवाल अमित ठाकरे यांनी उपस्थित केला. त्यानंतर त्यांनी सोबत असलेल्या कार्यकर्त्याला मोदींचा फोटो काढण्यास सांगितले.
दरम्यान, या घटनेवर भाजपकडून प्रतिक्रिया देण्यात आली आहे. भाजप आमदार अतुल भातखळकर यांनी अमित ठाकरे यांच्या कृतीवर टीका केली. फोटो काढल्याने पंतप्रधान नरेंद्र मोदी यांचे लोकांच्या मनातील स्थान कमी होणार नाही, असे त्यांनी म्हटले.
या घटनेनंतर मनसे आणि भाजपमध्ये राजकीय आरोप-प्रत्यारोप होण्याची शक्यता असून, पुण्यातील या प्रकाराची राजकीय वर्तुळात चर्चा सुरू झाली आहे.
