शिरूर: शिरूर परिसरातून (Pune News) प्रवास करणाऱ्या प्रवाशांसाठी आणि भाविकांसाठी एक महत्त्वाची बातमी आहे. प्रसिद्ध आध्यात्मिक वक्ते पंडित प्रदीप मिश्रा यांच्या ‘शिवमहापुराण’ कथेचे आयोजन शिरूरमधील रामलिंग रोड येथे करण्यात आले आहे. या कार्यक्रमाला होणारी लाखोंची गर्दी लक्षात घेता, शिरूर-पाबळ रस्ता (राज्य महामार्ग 54) वरील वाहतूक 24 फेब्रुवारी ते 2 मार्च 2026 या कालावधीत पूर्णपणे वळवण्यात आली आहे.
बदल नेमका काय आणि का?
जिल्हाधिकारी जितेंद्र डुडी यांनी जारी केलेल्या आदेशानुसार, दररोज सकाळी 10 ते सायंकाळी 6 या वेळेत हे बदल लागू राहतील. पंडित प्रदीप मिश्रा यांच्या कथेला देशभरातून मोठा प्रतिसाद मिळतो. अशा वेळी शिरूरच्या अरुंद रस्त्यांवर वाहतूक कोंडी होऊन गोंधळ उडू नये आणि भाविकांच्या सुरक्षेला प्राधान्य मिळावे, हा या निर्णयामागचा मुख्य हेतू आहे.
वाहतुकीचे नवीन मार्ग
शिरूर किंवा पाबळच्या दिशेने प्रवास करणार असाल, तर खालील पर्यायी मार्गांचा वापर करा:
-
शिरूरकडून रामलिंगकडे जाताना: पाबळ रोडऐवजी अग्निशामक केंद्र चौकातून नवीन नगरपालिका रोडने जावे. तिथून जुना अहिल्यानगर-पुणे हायवे पकडून बगाड रोडमार्गे बैलगाडा शर्यत घाट चौकातून रामलिंगला पोहोचता येईल.
-
रामलिंगकडून शिरूरकडे येताना: भाविकांनी बैलगाडा शर्यत घाट चौक – बगाड रोड – बरला आर्ट्स शेजारून जुना पुणे-अहिल्यानगर हायवे या मार्गाचा अवलंब करावा.
कार्यक्रमासाठी येणाऱ्या भाविकांना आपली वाहने निश्चित केलेल्या पार्किंग स्थळांवरच उभी करावी लागणार आहेत. तिथून कथा स्थळापर्यंतचा प्रवास पायी करावा लागेल.
